उरण : प्रतिनिधी
“शिक्षक कधीच रिटायर होत नाही; तो आयुष्यभर विद्यार्थ्यांना घडवत राहतो,” असे गौरवोद्गार जे. एम. म्हात्रे यांनी काढले. आदर्श मुख्याध्यापक सुधीर शांताराम मुंबईकर यांच्या सेवानिवृत्ती निमित्त आयोजित सेवापूर्ती सत्कार सोहळ्यात ते बोलत होते.
जे. एम. म्हात्रे चॅरिटेबल ट्रस्ट संस्था, विद्या संकुल मोरा (ता. उरण) येथील मुख्याध्यापक सुधीर मुंबईकर हे ३६ वर्षांच्या प्रदीर्घ सेवेनंतर नियत वयोमानानुसार सेवानिवृत्त झाले. त्यांच्या सेवापूर्ती निमित्त सोमवार, दि. ३० मार्च २०२६ रोजी मोरा येथील विद्या संकुलात चेअरमन परशुराम मोतीराम कोळी यांच्या अध्यक्षतेखाली भव्य सत्कार सोहळा पार पडला.
यावेळी बोलताना जे. एम. म्हात्रे यांनी शिक्षकांची भूमिका समाजनिर्मितीत अत्यंत महत्त्वाची असल्याचे सांगितले. ग्रामीण व दुर्गम भागात शाळा चालविणे हे आव्हानात्मक असताना सुधीर मुंबईकर यांनी उत्कृष्ट कार्य केल्याचे त्यांनी नमूद केले. त्यांच्या ज्ञानाचा व कार्याचा शाळेला मोठा लाभ झाला असल्याचेही त्यांनी सांगितले.
या कार्यक्रमास न्हावा ग्रामपंचायतीचे माजी सरपंच जितेंद्र म्हात्रे, शिक्षणाधिकारी निर्मला घरत, विविध शाळांचे चेअरमन, मुख्याध्यापक, शिक्षक, विद्यार्थी, माजी विद्यार्थी तसेच ग्रामस्थ मोठ्या संख्येने उपस्थित होते.
कार्यक्रमात सुधीर मुंबईकर यांच्या कार्याचा आढावा घेणारा जीवनपट सादर करण्यात आला. माजी विद्यार्थीनी, सहकारी शिक्षक आणि विविध मान्यवरांनी आपल्या मनोगतातून त्यांच्या कार्याचे कौतुक केले. “विद्यार्थी हेच माझे दैवत आहे,” असे भावनिक उद्गार काढताना मुंबईकर सरांना अश्रू अनावर झाले.
सुधीर मुंबईकर यांनी आपल्या सेवाकाळात चिरनेर येथे ८ वर्षे, व्ही. के. हायस्कूलमध्ये १ वर्ष व मोरा येथे २८ वर्षे सेवा बजावली. त्यांच्या कार्यासाठी त्यांना रायगड जिल्हा परिषद आदर्श शिक्षक पुरस्कार, द्रोणागिरी भूषण पुरस्कार तसेच अनेक सन्मान प्राप्त झाले आहेत.
सध्या ते विविध शैक्षणिक व सामाजिक संस्थांमध्ये पदाधिकारी म्हणून कार्यरत असून त्यांच्या सामाजिक बांधिलकीमुळे त्यांना सर्व स्तरांतून शुभेच्छांचा वर्षाव होत आहे.
