उरण : प्रतिनिधी
उरण तालुक्यातील शेलघर येथे आयोजित करण्यात आलेल्या भव्य टेनिस क्रिकेट स्पर्धा ‘एम जी ट्रॉफी’ सध्या जिल्ह्यात चर्चेचा विषय ठरत आहेत. विजेत्यांसाठी तब्बल २१ बाईक बक्षीस ठेवण्यात आल्याने या स्पर्धेची विशेष चर्चा रंगली आहे. या स्पर्धेला भारताचे माजी डावखुरे फिरकी गोलंदाज निलेश कुलकर्णी यांनी उपस्थिती लावून कार्यक्रमाची शोभा वाढवली.
१९९७ साली श्रीलंकेविरुद्ध आंतरराष्ट्रीय क्रिकेटमध्ये पदार्पण करताना पहिल्याच चेंडूवर विकेट घेण्याचा मान मिळवणारे कुलकर्णी यांनी आपल्या कारकिर्दीत उल्लेखनीय कामगिरी केली आहे. मुंबई संघाकडून खेळताना त्यांनी बडोदा संघाचे १० बळी १२० धावांत घेतल्याची कामगिरी विशेष गाजली होती.
या स्पर्धेच्या निमित्ताने आंतरराष्ट्रीय कामगार नेते व काँग्रेसचे रायगड जिल्हाध्यक्ष महेंद्रशेठ घरत यांनी निलेश कुलकर्णी यांचे फटाक्यांच्या आतषबाजीने स्वागत केले. त्यानंतर शाल व सन्मानचिन्ह देऊन त्यांचा गौरव करण्यात आला.
यावेळी बोलताना निलेश कुलकर्णी म्हणाले, “खेळ कोणताही असो, त्यासाठी मी नेहमी सहकार्य करायला तयार आहे. ग्रामीण भागात अशा प्रकारच्या स्पर्धांचे आयोजन होणे ही आनंदाची बाब आहे. सुविधा कमी असतानाही खेळाडूंनी जिद्दीने प्रयत्न केल्यास मोठे यश मिळवता येते.”
ग्रामीण भागातील खेळाडूंना प्रोत्साहन देण्यासाठी होत असलेले हे प्रयत्न कौतुकास्पद असल्याचेही त्यांनी नमूद केले.
