के. के. एम. महाविद्यालयात पुंडलिक साबळे यांचा सेवानिवृत्ती समारंभ उत्साहात

परभणी : प्रतिनिधी
मानवत येथील के. के. एम. महाविद्यालयातील ज्येष्ठ शिक्षक पुंडलिक साबळे यांच्या सेवानिवृत्ती निमित्त आयोजित सत्कार समारंभ दि. १ एप्रिल २०२६ रोजी उत्साहपूर्ण वातावरणात पार पडला.

या कार्यक्रमाच्या अध्यक्षस्थानी संस्थेचे संचालक संजयजी बांगड होते. तसेच प्राचार्य डॉ. भास्कर मुंडे, उपप्राचार्य डॉ. के. जी. हुगे, पर्यवेक्षक प्रा. अनिल कापसे यांच्यासह अनेक मान्यवर व्यासपीठावर उपस्थित होते.

कार्यक्रमाच्या प्रारंभी प्राचार्य डॉ. भास्कर मुंडे यांनी प्रस्ताविकात साबळे यांच्या कार्याचा गौरव केला. त्यांनी सेवाकाळात प्रामाणिकपणा, शांत स्वभाव आणि सचोटीने काम करत महाविद्यालयाच्या प्रगतीत मोलाचे योगदान दिल्याचे नमूद केले.

यावेळी अनिल सोळंके, अशोक काकडे, दुलीचंद खोब्रागडे आणि प्रा. अनिल कापसे यांनी मनोगत व्यक्त करत साबळे यांच्या सहकार्यशील वृत्ती व साधेपणाचा उल्लेख केला.

सत्काराला उत्तर देताना पांडुरंग (पुंडलिक) साबळे यांनी सेवाकाळातील अनुभव सांगत संस्थाचालक, प्राचार्य आणि सहकाऱ्यांचे सहकार्य लाभल्याबद्दल कृतज्ञता व्यक्त केली.

यावेळी पुंडलिक साबळे व त्यांच्या पत्नी सौ. रंजना साबळे यांचा संस्थेच्या व कर्मचाऱ्यांच्या वतीने सन्मानपूर्वक गौरव करण्यात आला.

कार्यक्रमाचे सूत्रसंचालन डॉ. शारदा राऊत यांनी केले, तर आभार प्रदर्शन अनिल सोळंके यांनी मानले. या समारंभास महाविद्यालयातील प्राध्यापक, कर्मचारी, मित्रपरिवार व इतर उपस्थित मोठ्या संख्येने सहभागी झाले होते.

समारंभ आनंददायी आणि भावनिक वातावरणात संपन्न झाला.