नाशिक (प्रतिनिधी): आगामी कुंभमेळ्याच्या पार्श्वभूमीवर नाशिक जिल्हाधिकारी कार्यालयात महत्त्वपूर्ण बैठक पार पडली. कुंभमंत्री नामदार गिरीशभाऊ महाजन यांच्या मार्गदर्शनाखाली झालेल्या या बैठकीत कुंभमेळ्याच्या सर्वांगीण नियोजनावर सखोल चर्चा करण्यात आली.
बैठकीत विशेषतः पेट्रोल, डिझेल आणि गॅसच्या संभाव्य तुटवड्याबाबत समाजमाध्यमांवर पसरत असलेल्या अफवांचा गांभीर्याने आढावा घेण्यात आला. प्रशासन पूर्णपणे सज्ज असून कोणताही तुटवडा भासणार नाही, असा विश्वास अधिकाऱ्यांनी व्यक्त केला.
यावेळी गिरीश महाजन यांनी नागरिकांना आवाहन करताना सांगितले की, अशा भ्रामक अफवांवर विश्वास ठेवू नये आणि संयम राखून प्रशासनाला सहकार्य करावे. सुरक्षित, सुव्यवस्थित आणि यशस्वी कुंभमेळा पार पाडण्यासाठी प्रशासन कटिबद्ध असल्याचेही त्यांनी स्पष्ट केले.
या बैठकीस नाशिक जिल्हाधिकारी आयुष प्रसाद, नाशिक महानगरपालिका आयुक्त मनिषा खत्री, स्थायी समिती सभापती मच्छिंद्र सानप यांच्यासह अनेक नगरसेवक आणि शासकीय अधिकारी उपस्थित होते.
