छत्रपती संभाजीनगर : प्रतिनिधी
महाराष्ट्र शिक्षण परिषद मंडळाच्या (MPSP) वतीने राबविण्यात आलेल्या ‘राणी लक्ष्मीबाई आत्मरक्षा प्रशिक्षण’ उपक्रमांतर्गत छत्रपती संभाजीनगर जिल्ह्यात विद्यार्थिनींना प्रशिक्षण पूर्ण केल्याची प्रमाणपत्रे वितरित करण्यात आली.
२०२५-२६ या कालावधीत राबविण्यात आलेल्या या उपक्रमांतर्गत राज्यभरातील सुमारे १५ लाख मुलींना आत्मरक्षणाचे प्रशिक्षण देत एक प्रकारचा विश्वविक्रम प्रस्थापित करण्यात आला आहे. माननीय शिक्षण मंत्री दादासाहेब भुसे यांच्या मार्गदर्शनाखाली हा महत्त्वाकांक्षी उपक्रम यशस्वीपणे राबविण्यात आला.
या प्रशिक्षणामध्ये विद्यार्थिनींना आत्मसंरक्षणाचे धडे, योगा, जीवन कौशल्य विकास तसेच मूलभूत सैनिक प्रशिक्षण देण्यात आले. यामुळे मुलींमध्ये शिस्त, सातत्य, आत्मविश्वास आणि खंबीरपणा विकसित होण्यास मोठी मदत होत असल्याचे सांगण्यात आले.
याबाबत बोलताना शिक्षणमंत्री दादासाहेब भुसे म्हणाले, “मुलींचे सशक्तीकरण आणि सुरक्षा हे सरकारचे प्रमुख उद्दिष्ट आहे. या उपक्रमातून महाराष्ट्र देशासाठी आदर्श निर्माण करेल.”
हा उपक्रम महाराष्ट्र प्राथमिक शिक्षण परिषद यांच्या मार्गदर्शनाखाली तसेच शिक्षणाधिकारी (प्राथमिक) चव्हाण मॅडम यांच्या नेतृत्वात संपूर्ण जिल्ह्यात प्रभावीपणे राबविण्यात आला.
प्रशिक्षण पूर्ण केलेल्या विद्यार्थिनींना प्रमाणपत्र देऊन त्यांच्या कर्तृत्वाचा गौरव करण्यात आला असून, या उपक्रमामुळे मुलींच्या सुरक्षेबाबत जागरूकता आणि आत्मविश्वास वाढण्यास मोठी मदत होत आहे.
