हिमायतनगर, दि. (प्रतिनिधी) : हिमायतनगर नगरपंचायतसमोर छत्रपती शिवाजी महाराजांच्या पुतळ्यासाठी जागा उपलब्ध करून देण्याच्या मागणीसाठी सुरू असलेले आमरण उपोषण आता अधिक तीव्र झाले आहे.
उपोषणकर्ते माधव शिंदे यांच्या आंदोलनाला पाठिंबा देत समर्थकांनी प्रशासनाला इशारा दिला आहे की, तातडीने पुतळ्यासाठी जागा उपलब्ध करून न दिल्यास सर्व समाजाला सोबत घेऊन गाव बंद आंदोलन छेडण्यात येईल.
या आंदोलनस्थळी स्वाभिमानी संभाजी ब्रिगेडचे यवतमाळ जिल्हाध्यक्ष गजानन शिंदे झाडगांवकर, जिल्हा उपाध्यक्ष शिवाजी कदम (कारखेड), युवा जिल्हाध्यक्ष लोकपाल पाटील माने (चातारीकर), तालुका संघटक राजू क्षीरसागर, हिमायतनगर तालुकाध्यक्ष अवधूत पाटील एकंबेकर यांच्यासह अनेक नागरिक व पत्रकार उपस्थित होते.
या मागणीमुळे परिसरात तणावपूर्ण वातावरण निर्माण झाले असून प्रशासन पुढे काय भूमिका घेते याकडे सर्वांचे लक्ष लागले आहे.
