माहूर, दि. (प्रतिनिधी) : सध्या आंतरराष्ट्रीय पातळीवरील तणावपूर्ण परिस्थितीच्या पार्श्वभूमीवर देशात इंधनाचा तुटवडा जाणवत असल्याच्या चर्चा सुरू असतानाच माहूर येथील मंजुनाथ पेट्रोल पंपावर पेट्रोल व डिझेलचा काळाबाजार झाल्याचा आरोप करण्यात आला आहे.
प्रशासनाच्या निर्देशांनुसार पेट्रोल पंपांवर मोटारसायकलसाठी मर्यादित इंधन वितरण तसेच चारचाकी वाहनांसाठी ठरावीक मर्यादा निश्चित करण्यात आल्या असताना, तसेच इंधनाचे योग्य वितरण व्हावे यासाठी स्पष्ट मार्गदर्शक सूचना देण्यात आलेल्या असताना, नियम धाब्यावर बसवून व्यवहार झाल्याचा आरोप स्थानिक नागरिकांकडून केला जात आहे.
दिनांक २ एप्रिल रोजी रात्री सुमारे ११ वाजताच्या सुमारास पेट्रोल पंपावरील लाईट बंद करून मोठ्या बॅरलमध्ये जास्त दराने पेट्रोल व डिझेलची अवैध विक्री करण्यात आल्याचे काही नागरिकांनी निदर्शनास आणल्याचा दावा करण्यात आला आहे. यामुळे परिसरात संतापाचे वातावरण निर्माण झाले आहे.
या प्रकारामुळे इंधन वितरणातील पारदर्शकतेवर प्रश्नचिन्ह निर्माण झाले असून संबंधित पेट्रोल पंपधारकावर तहसील प्रशासनाने तातडीने चौकशी करून कठोर कारवाई करावी, अशी मागणी नागरिकांकडून करण्यात येत आहे.
