शहादा, दि.०४ (प्रतिनिधी) : महाराष्ट्र राज्यात प्रतिबंधित असलेल्या सुगंधित तंबाखूची अवैध वाहतूक करणाऱ्या आयशर ट्रकवर शहादा पोलिसांनी मोठी कारवाई करत तब्बल १७ लाख ६१ हजार रुपयांचा मुद्देमाल जप्त केला आहे. ही कारवाई प्रकाशा गावाजवळ करण्यात आली.
मिळालेल्या माहितीनुसार, शनिवारी (दि.४ एप्रिल) सकाळी सुमारे ९.१० वाजता तळोदा-प्रकाशा रोडवरील हॉटेल तापी परिसरात संशयित आयशर वाहन (क्र. MH 18 BG 9509) पोलिसांना आढळले. वाहनाची तपासणी केली असता त्यामध्ये विक्रीच्या उद्देशाने साठवलेला मोठ्या प्रमाणात प्रतिबंधित सुगंधित तंबाखू आढळून आला.
पोलिसांनी कारवाईदरम्यान युवा गोल्ड ३५ तंबाखू (२०० ग्रॅम) ९०० पाकिटे (किंमत ८१ हजार रुपये), युवा गोल्ड ३५ तंबाखू (४० ग्रॅम) ४५०० पाकिटे (किंमत १ लाख ८० हजार रुपये) आणि आयशर वाहन (किंमत १५ लाख रुपये) असा एकूण १७ लाख ६१ हजार रुपयांचा मुद्देमाल जप्त केला.
या प्रकरणी अन्न व औषध प्रशासन विभागाचे अधिकारी तुषार किशोर देवरे यांच्या फिर्यादीवरून आरोपी गोकुळ पितांबर शिंदे (वय २७, रा. खोरी, ता. साक्री, जि. धुळे) याच्याविरुद्ध शहादा पोलीस ठाण्यात गुन्हा रजिस्टर क्रमांक ७३३/२०२६ नुसार भारतीय न्याय संहिता व अन्न सुरक्षा मानके कायद्यांतर्गत गुन्हा दाखल करण्यात आला आहे.
ही कारवाई पोलीस अधीक्षक श्रवण दत्त एस., अपर पोलीस अधीक्षक आशित कांबळे, उपविभागीय पोलीस अधिकारी दत्ताजी पवार यांच्या मार्गदर्शनाखाली वरिष्ठ पोलीस निरीक्षक हेमंतकुमार पाटील, सपोनि संदीप वाघ आणि त्यांच्या पथकाने यशस्वीरीत्या पार पाडली.
