शहादा (प्रतिनिधी) :
समस्त गुजर नाभिक समाज पंच मंडळ, शहादा विभागाची सर्वसाधारण सभा व देवी उत्सव चैत्र पौर्णिमेनिमित्त मोठ्या उत्साहात आणि खेळीमेळीच्या वातावरणात पार पडला. संत सेना नाभिक समाज भवन, रामदेव बाबा नगर, शहादा येथे या कार्यक्रमाचे आयोजन करण्यात आले होते.
कार्यक्रमाच्या अध्यक्षस्थानी विभागाचे अध्यक्ष भूषण राजाराम पवार होते. प्रमुख अतिथी म्हणून अखिल भारतीय गुजर नाभिक समाजाचे अध्यक्ष उद्धव मक्कन जांभळे, संत सेना समाज सेवा मंडळाचे अध्यक्ष अशोक भबुता सोनवणे, नगरसेविका ममता हेमराज पवार, आमदार राजेश पाडवी यांचे स्वीय सहाय्यक हेमराज पवार, शिक्षण समितीचे अध्यक्ष सुभाष सोनवणे, तसेच विविध सामाजिक संस्थांचे पदाधिकारी उपस्थित होते. समाजातील विविध मंडळांचे पदाधिकारी, सदस्य आणि समाजबांधव मोठ्या संख्येने उपस्थित होते.
कार्यक्रमाची सुरुवात नाभिक समाजाची कुलस्वामिनी लिंबच माता व आराध्य दैवत संत सेना महाराज यांच्या प्रतिमेच्या पूजनाने व आरतीने झाली. यावेळी समाजातील उल्लेखनीय कार्याबद्दल ममता हेमराज पवार यांना समाज-रत्न पुरस्कार, अशोक भबुता सोनवणे यांना समाज-भूषण पुरस्कार, तर भूषण राजाराम पवार यांना युवा-प्रेरणा पुरस्कार देऊन सन्मानित करण्यात आले. तसेच नवरात्र उत्सव मंडळाच्या वतीनेही ममता पवार यांना समाज गौरव पुरस्कार व भूषण पवार यांना युवा नेतृत्व पुरस्कार प्रदान करण्यात आला.
यावर्षीच्या सभेत एक अभिनव उपक्रम राबविण्यात आला. ७५ वर्ष पूर्ण करून अमृत महोत्सवी वर्षात प्रवेश केलेल्या ५२ ज्येष्ठ समाजबांधवांचा सन्मान करण्यात आला. हिरालाल बोरदेकर व उद्धव मक्कन जांभळे यांच्यासह ज्येष्ठांना प्रमाणपत्र, भगवद्गीता व भगवान श्रीरामाचा स्कार्फ देऊन गौरविण्यात आले. तसेच केंद्रीय शिक्षक पात्रता परीक्षा (CTET) उत्तीर्ण झालेल्या जगदीश सोलंकी यांचाही सत्कार करण्यात आला.
सभेत समाजाच्या प्रगतीसाठी विविध विषयांवर चर्चा करण्यात आली. युवकांना प्रोत्साहन देणे, सामाजिक एकोपा वाढवणे आणि समाजहिताचे विविध विकास उपक्रम राबविणे याबाबत ठराव मंजूर करण्यात आले. यावेळी उद्धव जांभळे, प्रा. सुभाष सोनवणे, ममता पवार, प्रा. डॉ. अनिल साळुंके, अशोक सोनवणे, हिरालाल बोरदेकर, जगदीश सोलंकी, परमेश्वर चव्हाण व हेमराज पवार यांनी मनोगत व्यक्त केले.
कार्यक्रमाचे प्रस्ताविक भूषण पवार यांनी केले, सूत्रसंचालन प्रा. गणेश कन्हैया यांनी केले तर आभार संजय बोरदेकर यांनी मानले. कार्यक्रमाच्या यशस्वितेसाठी शहादा विभागीय पंच, कार्यकारिणी सदस्य व समाजबांधवांनी विशेष सहकार्य केले.
