उरण (प्रतिनिधी) :
पनवेल तालुक्यातील उलवे नोडमधील मोरावे येथील मुरबा गणपती मंदिरात येणाऱ्या भाविकांच्या सुरक्षिततेसाठी यमुना सामाजिक शैक्षणिक संस्थेतर्फे दुसऱ्या पॅसेंजर बोटीचे लोकार्पण करण्यात आले. कॉंग्रेसचे रायगड जिल्हाध्यक्ष Mahendra Sheth Gharat यांच्या हस्ते या बोटीचे उद्घाटन झाले.
मुरबा गणपती मंदिर सध्या भाविकांच्या आकर्षणाचे केंद्र ठरत असून संकष्टी चतुर्थीच्या दिवशी पनवेल, ठाणे, भिवंडी, मुरबाड व नवी मुंबई परिसरातून मोठ्या संख्येने गणेशभक्त येथे दर्शनासाठी येतात. मंदिरापर्यंत पोहोचण्यासाठी समुद्रमार्गे होडी हा एकमेव पर्याय असल्याने प्रवासात सुरक्षिततेचा प्रश्न निर्माण होत होता.
याआधी २९ मे २०२५ रोजी पहिली पॅसेंजर बोट व लाईफ जॅकेट देण्यात आले होते. मात्र वाढत्या गर्दीचा विचार करून दुसरी बोट देण्याचा निर्णय घेण्यात आला. संकष्टी चतुर्थीच्या शुभमुहूर्तावर या बोटीचे लोकार्पण करण्यात आले.
यावेळी बोलताना महेंद्रशेठ घरत म्हणाले, “मी केवळ गणेशभक्त नसून सेवक आहे. भक्तांची वाढती संख्या लक्षात घेऊन त्यांच्या सुरक्षिततेसाठी ही दुसरी बोट देण्यात आली आहे. भक्ती आणि सुरक्षेचा संगम साधण्याचा हा प्रयत्न आहे.”
मोरावे गावातील तरुणांनी समुद्रात उभारलेले मुरबा गणपती मंदिर हे धाडसाचे प्रतीक मानले जाते. या मंदिरामुळे परिसरात पर्यटनाला चालना मिळत असून स्थानिक तरुणांना रोजगाराच्या संधी उपलब्ध होत आहेत.
या कार्यक्रमाला उरण तालुका अध्यक्ष विनोद म्हात्रे, जिल्हा परिषद सदस्य डॉ. मनीष पाटील, ॲड. अविनाश ठाकूर, माजी जिल्हा परिषद सदस्य रवींद्र पाटील, श्रीकांत घरत, रमेश घरत तसेच एम. जी. ग्रुपचे सदस्य व मोठ्या संख्येने गणेशभक्त उपस्थित होते.
