पालम (प्रतिनिधी) – पालम शहरात प्रथमच सकल हिंदू समाजाच्या वतीने हिंदू महासंमेलनाचे आयोजन करण्यात आले असून, दि. ९ रोजी गुरुवारी महारुद्र मंदिर परिसरात हा कार्यक्रम पार पडणार आहे. या महासंमेलनाला तालुक्यातील समस्त हिंदू बांधवांनी मोठ्या संख्येने उपस्थित राहावे, असे आवाहन आयोजकांनी केले आहे.
हिंदू समाजामध्ये सामाजिक समरसता, सांस्कृतिक जागरूकता आणि राष्ट्रीय बांधिलकी दृढ करण्याच्या उद्देशाने या महासंमेलनाचे आयोजन करण्यात आले आहे. या व्यासपीठावर विविध क्षेत्रातील मान्यवर मार्गदर्शन करणार असून समाजजागृतीसह संघटन बळकटीकरणावर भर दिला जाणार आहे.
कार्यक्रमाला ह.भ.प. श्री नारायण महाराज पालमकर, परमपूज्य दत्तराज बाबा कोटी, निलेश चंद्रकांत गद्रे यांच्यासह अनेक मान्यवरांची उपस्थिती लाभणार आहे.
या संमेलनात युवक-युवती, सामाजिक कार्यकर्ते तसेच सर्वसामान्य नागरिकांनी उत्स्फूर्त सहभाग नोंदवावा, असे आवाहन सकल हिंदू समाजाच्या वतीने करण्यात आले आहे.
