कळंबोली | प्रतिनिधी :
भारतीय जनता पक्षाचा स्थापना दिवस ६ एप्रिल २०२६ रोजी कळंबोली येथे मोठ्या उत्साहात साजरा करण्यात आला. ६ एप्रिल १९८० रोजी स्थापन झालेला भाजप आज जगातील सर्वात मोठा राजकीय पक्ष म्हणून ओळखला जातो.
कळंबोली येथील भाजपच्या स्थानिक जनसंपर्क कार्यालयात मंडल अध्यक्ष अमर पाटील यांच्या हस्ते पक्ष ध्वज फडकवून कार्यक्रमाची सुरुवात झाली. यानंतर भारतरत्न अटल बिहारी वाजपेयी आणि पंडित दीनदयाल उपाध्याय यांच्या प्रतिमांना पुष्पहार अर्पण करून अभिवादन करण्यात आले.
या कार्यक्रमाला कळंबोली परिसरातील मोठ्या संख्येने पदाधिकारी आणि कार्यकर्ते उपस्थित होते. “भारत माता की जय” आणि “भारतीय जनता पक्ष झिंदाबाद” अशा घोषणांनी परिसर दणाणून गेला.
यावेळी पनवेलच्या उपमहापौर सौ. प्रमिला रविशेठ पाटील, मंडल अध्यक्ष अमर पाटील यांच्यासह स्थानिक नगरसेवक, नगरसेविका आणि प्रमुख पदाधिकारी उपस्थित होते. मान्यवरांनी पक्षाच्या ४६व्या वर्धापन दिनानिमित्त कार्यकर्त्यांना मार्गदर्शन करत पक्षाच्या विचारधारेचा प्रसार करण्याचे आवाहन केले.
दरम्यान, कळंबोलीसह संपूर्ण पनवेल महानगरपालिका क्षेत्रात विविध ठिकाणी स्थापना दिनानिमित्त कार्यक्रमांचे आयोजन करण्यात आले होते.
