चोपडा तंत्रनिकेतनात कॅम्पस प्लेसमेंटची मोठी भरारी; ५१ विद्यार्थ्यांची निवड

चोपडा (प्रतिनिधी) :
महात्मा गांधी शिक्षण मंडळ संचलित श्रीमती शरच्चद्रिका सुरेश पाटील इन्स्टिट्यूट ऑफ टेक्नॉलॉजी (इंजिनिअरिंग & पॉलिटेक्निक), चोपडा येथे आयोजित कॅम्पस प्लेसमेंट उपक्रमात विद्यार्थ्यांनी उल्लेखनीय यश संपादन केले. या उपक्रमातून एकूण ५१ विद्यार्थ्यांची निवड करण्यात आली असून संस्थेच्या शैक्षणिक गुणवत्तेला पुन्हा एकदा अधोरेखित करण्यात आले आहे.

निवड झालेल्या विद्यार्थ्यांमध्ये विद्युत विभागातील ३३, यांत्रिकी विभागातील १० तसेच आयटीआयचे ०८ विद्यार्थी यांचा समावेश आहे. ही भरती प्रक्रिया Schaeffler India Pvt Ltd आणि Randstad India यांच्या माध्यमातून पार पडली.

या प्रसंगी शेफ्लर इंडिया लिमिटेडचे प्रॉडक्शन हेड वसंत डोएबोले तसेच एचआर मॅनेजर शहाजी माने यांनी विद्यार्थ्यांना कंपनीविषयी सविस्तर माहिती दिली. Randstad India तर्फे विलास आव्हाळे यांनी मार्गदर्शन करत विद्यार्थ्यांना करिअरच्या संधींबाबत माहिती दिली. इन-प्लांट एचआर सागर दाऊने हेही यावेळी उपस्थित होते.

कार्यक्रमात प्राचार्य व्ही. एन. बोरसे यांनी विद्यार्थ्यांना मार्गदर्शन करताना कौशल्यविकासाचे महत्त्व अधोरेखित केले. “नोकरी मिळविणे हा केवळ प्रारंभ असून, उद्योग क्षेत्रातील बदल लक्षात घेऊन सतत स्वतःला अद्ययावत ठेवणे आवश्यक आहे,” असे त्यांनी सांगितले.

या उपक्रमाला संस्थेचे अध्यक्ष भैय्यासाहेब व संदीप सुरेश पाटील तसेच सचिव डॉ. स्मिता संदीप पाटील यांचे मार्गदर्शन लाभले. कार्यक्रमाचे सूत्रसंचालन धनराज आर. पाटील यांनी केले, तर आभार प्रदर्शन पी. के. चौधरी यांनी केले. संपूर्ण उपक्रमाचे यशस्वी आयोजन ट्रेनिंग अँड प्लेसमेंट ऑफिसर भूषण जे. पवार यांनी केले.