मोखाडा प्रतिनिधी:
पालघर जिल्ह्यातील मोखाडा तालुक्यातील खोडाळा येथे शासकीय विश्रामगृहापासून पोलीस चौकीपर्यंत बांधण्यात आलेल्या सिमेंट काँक्रिट रस्त्याच्या निकृष्ट दर्जामुळे स्थानिक ग्रामस्थांमध्ये तीव्र संताप व्यक्त होत आहे.
सुमारे २०० मीटर लांबीच्या या रस्त्याचे काम सार्वजनिक बांधकाम विभागामार्फत करण्यात आले आहे. मात्र, बांधकामात मोठ्या प्रमाणात अनियमितता झाल्याचे स्पष्ट दिसून येत आहे. रस्त्यावर मोठमोठे दगड टाकण्यात आले असून योग्य प्रमाणात सिमेंटचा वापर न झाल्याने रस्ता उखडलेला व खडबडीत झाला आहे.
स्थानिकांच्या मते, रस्ता बांधकामादरम्यान खोदकाम करताना काही घरांच्या पाणीपुरवठ्याच्या पाईपलाईन तुटल्या. त्यामुळे संबंधित कुटुंबांना आजपर्यंत पाण्यापासून वंचित राहावे लागत आहे. याबाबत अनेक वेळा तक्रारी करूनही प्रशासनाकडून कोणतीही ठोस कारवाई करण्यात आलेली नाही.
शिरसगाव, आडोशी आणि पाथर्डी या गावांकडे जाणाऱ्या नागरिकांचा मोठा प्रवास याच मार्गावरून होत असल्याने खराब रस्त्यामुळे वाहनचालक आणि प्रवाशांना मोठा त्रास सहन करावा लागत आहे.
ग्रामस्थांचा संताप:
“हा रस्ता पूर्णपणे निकृष्ट दर्जाचा आहे. मोठमोठे दगड टाकून काम उरकले आहे. चालताना आणि वाहन चालवताना त्रास होतो. पाणीपुरवठ्याच्या पाईपलाईन तोडल्यामुळे आम्हाला पाण्यासाठी टँकरवर अवलंबून राहावे लागत आहे. प्रशासनाने तात्काळ लक्ष देऊन रस्ता दुरुस्त करावा आणि पाण्याचा प्रश्न सोडवावा,” अशी प्रतिक्रिया ग्रामस्थ रुपेश हमरे यांनी दिली.
दरम्यान, संबंधित कामाची तात्काळ चौकशी करून दोषींवर कारवाई करावी व रस्ता दुरुस्त करावा, अशी मागणी ग्रामस्थांकडून करण्यात येत आहे.
