खेड | प्रतिनिधी :
खेड-आळंदी विधानसभा मतदारसंघातील सर्वसामान्य नागरिकांच्या समस्या तत्काळ सोडवण्यासाठी आमदार बाबाजी शेठ काळे यांनी २४ तास कार्यान्वित राहणारी ‘आमदार हेल्पलाइन सेवा’ सुरू केली आहे. ७३९१९१९१०९ या क्रमांकावर संपर्क साधून नागरिकांना त्यांच्या अडचणी थेट लोकप्रतिनिधींपर्यंत पोहोचवता येणार आहेत.
या उपक्रमाचा मुख्य उद्देश म्हणजे नागरिकांच्या समस्या जलदगतीने सोडवणे आणि त्यांना शासकीय कार्यालयांच्या फेऱ्यांपासून दिलासा देणे हा आहे. छोट्या-छोट्या कामांसाठी वेळ वाया न घालवता नागरिकांना या हेल्पलाइनद्वारे त्वरित मदत मिळणार आहे.
या सेवेच्या माध्यमातून तालुक्यातील विविध प्रश्न, तक्रारी, विकासकामांबाबत सूचना तसेच परिसरातील गैरप्रकारांची माहिती नोंदवता येणार असून संबंधित अधिकारी व कर्मचाऱ्यांकडून त्यावर तात्काळ कारवाई केली जाणार आहे.
हेल्पलाइन सेवेला नागरिकांचा उत्स्फूर्त प्रतिसाद मिळत असून एका दिवसात सुमारे २०० ते २५० नागरिकांनी संपर्क साधून आपल्या समस्या नोंदवल्याची माहिती देण्यात आली आहे. तसेच, तक्रारदारांची ओळख पूर्णपणे गुप्त ठेवली जाणार असल्याचेही स्पष्ट करण्यात आले आहे.
लवकरच या हेल्पलाइन संदर्भातील माहिती तालुक्यातील सर्व शासकीय कार्यालयांच्या बाहेर फलकाद्वारे उपलब्ध करून देण्यात येणार आहे. या उपक्रमामुळे नागरिक आणि प्रशासन यांच्यातील दरी कमी होऊन समस्यांचे त्वरित निराकरण होण्यास मदत होणार आहे.
