शहादा, दि. ६ : “उद्याचे भविष्य असलेल्या बालकांचे आरोग्य सुदृढ राहिले, तरच जगाचे आरोग्य सुदृढ राहील” या ब्रीदवाक्याने प्रेरित होऊन नंदुरबार जिल्ह्यात राष्ट्रीय बाल स्वास्थ्य कार्यक्रम (RBSK) अंतर्गत उल्लेखनीय काम सुरू आहे. जागतिक आरोग्य दिनाचे औचित्य साधत, शहादा तालुक्यातील शहाणा येथील ५ महिन्यांच्या अक्षरा नवीन पावरा या चिमुकलीवर मुंबईत यशस्वी मोफत ओपन हार्ट सर्जरी करण्यात आली असून तिला नवजीवन मिळाले आहे.
जिल्हा शल्य चिकित्सक डॉ. विनय सोनवणे यांच्या मार्गदर्शनाखाली आरबीएसके पथक दुर्गम भागात बालकांची तपासणी करत असताना डॉ. राकेश पाटील व डॉ. उज्वला भामरे यांनी अंगणवाडी केंद्रात अक्षराची तपासणी केली असता हृदयविकाराचे प्राथमिक निदान झाले. आदिवासी व दुर्गम भागातील पालकांमध्ये शस्त्रक्रियेबाबत असलेली भीती दूर करणे हे मोठे आव्हान होते. पथकाने 2D इको, एक्स-रे व शस्त्रक्रियेची सविस्तर माहिती देत समुपदेशन करून पालकांचा विश्वास संपादन केला. यासाठी स्थानिक सरपंच, पोलीस पाटील व अंगणवाडी सेविकांचेही सहकार्य लाभले.
शासकीय योजनेचा आधार, मुंबईत यशस्वी शस्त्रक्रिया
अक्षराच्या शस्त्रक्रियेसाठी आवश्यक कागदपत्रांची पूर्तता करण्यासाठी डॉ. राकेश पाटील, डॉ. उज्वला भामरे, भाग्यश्री सोनार व मयुर निकुंभ यांनी विशेष प्रयत्न केले. महात्मा ज्योतिबा फुले जन आरोग्य योजनेअंतर्गत नोंदणी पूर्ण करून शहादा ग्रामीण रुग्णालयाचे वैद्यकीय अधीक्षक डॉ. मंगेश बर्डे व डॉ. मनिषा पाटील यांच्या सहकार्याने मुंबई येथील ‘केआयएमएस’ रुग्णालयात तज्ज्ञ डॉ. एल. श्रीनिवास यांच्या मार्गदर्शनाखाली ही शस्त्रक्रिया करण्यात आली. सुमारे २.५ ते ३ लाख रुपये खर्चाची ही ओपन हार्ट सर्जरी पूर्णतः मोफत पार पडली. सध्या अक्षराची प्रकृती उत्तम असून तिच्या पालकांनी समाधान व्यक्त केले आहे.
आरबीएसके पथकाचा उल्लेखनीय टप्पा
गेल्या १३ वर्षांपासून कार्यरत असलेल्या या पथकाने आतापर्यंत ५१ हृदय शस्त्रक्रिया, २ कॉक्लियर इम्प्लांट आणि ९० इतर शस्त्रक्रिया यशस्वीरित्या पूर्ण केल्या आहेत. “पालकांच्या विश्वासामुळेच हे शक्य झाले. अजूनही काही बालके पालकांच्या नकारामुळे शस्त्रक्रियेपासून वंचित आहेत; त्यांच्यापर्यंत पोहोचण्याचा आमचा प्रयत्न सुरू आहे,” असे डॉ. राकेश पाटील व डॉ. उज्वला भामरे यांनी सांगितले.
पालकांची भावना
“माझ्या मुलीला हृदयविकार असल्याचे समजल्यावर आम्ही खचलो होतो. पण डॉक्टरांनी आम्हाला धीर दिला आणि प्रत्येक टप्प्यावर मदत केली. त्यांच्या प्रयत्नांमुळेच आज माझी मुलगी सुरक्षित आहे.”
— नवीन पावरा (अक्षराचे वडील, शहाणा)
