शहादा, दि. ०६ (प्रतिनिधी) : शहादा येथील बस स्थानकावर कडाक्याच्या उन्हामुळे प्रवाशांचे होत असलेले हाल दर्शवणारा व्हिडिओ सोशल मीडियावर व्हायरल झाल्यानंतर परिवहन महामंडळाने तातडीने दखल घेतली आहे. शहादा आगाराचे आगार व्यवस्थापक हरीष भोई यांनी संवेदनशीलतेने पावले उचलत स्थानकावर पंखे बसवण्याच्या कामाला युद्धपातळीवर सुरुवात केली आहे.
गेल्या काही दिवसांपासून तापमानात मोठी वाढ झाल्याने बस स्थानकावर प्रवाशांची अवस्था दयनीय झाली होती. स्थानकातील अनेक पंखे बंद असल्यामुळे वयोवृद्ध, महिला आणि लहान मुलांना प्रचंड उकाडा सहन करावा लागत होता. भीषण उष्णतेमुळे काही प्रवाशांना अस्वस्थता, बीपी लो होणे अशा तक्रारीही वाढल्या होत्या.
या गंभीर समस्येकडे राष्ट्रीय दिव्यांग विकास महासंघाचे राज्य उपाध्यक्ष शिवाजीराव मोरे यांनी लक्ष वेधले. त्यांनी बस स्थानकावरील परिस्थितीचा व्हिडिओ सोशल मीडियावर व्हायरल करत प्रशासनाला जाब विचारला होता.
या व्हिडिओची दखल घेत आगार व्यवस्थापक हरीष भोई यांनी केवळ आश्वासन न देता प्रत्यक्ष काम सुरू करण्याचे आदेश दिले. लवकरच बस स्थानकावर नवीन पंखे बसवले जाणार असून प्रवाशांना मोठा दिलासा मिळणार आहे.
दरम्यान, या प्रश्नावर तालुका पत्रकार संघाचे अध्यक्ष प्रा. नेत्रदीपक कुवर, सचिव योगेश सावंत, उपाध्यक्ष हर्षल साळुंखे व इतर पदाधिकाऱ्यांनीही सातत्याने पाठपुरावा केला होता.
सोशल मीडियाच्या माध्यमातून एका गंभीर समस्येवर सकारात्मक तोडगा निघाल्याने नागरिकांनी समाधान व्यक्त केले आहे. तसेच सजग नागरिक म्हणून शिवाजीराव मोरे यांनी घेतलेली भूमिका आणि प्रशासकीय तत्परता दाखवणारे हरीष भोई यांचे सर्वत्र कौतुक होत आहे.
