उरण, दि. ७ : ग्रामपंचायत नवघरच्या घनकचरा व्यवस्थापनासाठी अखेर ओएनजीसी कंपनीकडून नवीन घंटागाडी उपलब्ध करून देण्यात आली असून गावातील स्वच्छता व्यवस्थेला मोठा दिलासा मिळाला आहे.
गेल्या दोन महिन्यांपूर्वी ग्रामपंचायतीतर्फे सरपंच व उपसरपंच यांनी ओएनजीसीकडे घंटागाडीची मागणी करत ठराव सादर केला होता. त्यानंतर शिवसेना शाखाप्रमुख अविनाश म्हात्रे व नितीन मढवी यांनी प्रत्यक्ष भेट घेऊन या मागणीचा पाठपुरावा केला. तसेच एनजीओ संस्था व ओएनजीसी अधिकाऱ्यांशी सातत्याने संपर्क साधून आवश्यक कागदपत्रे सादर करण्यात आली.
या सातत्यपूर्ण प्रयत्नांना यश मिळत ओएनजीसीने ग्रामपंचायतीसाठी नवीन घंटागाडी उपलब्ध करून दिली. सोमवार, दि. ६ एप्रिल २०२६ रोजी उरण प्लांट येथे या गाडीचे उद्घाटन ओएनजीसीचे प्लांट मॅनेजर एस. एन. अहमद (CGM) आणि सपोर्ट मॅनेजर एस. के. मोहन यांच्या हस्ते हिरवा झेंडा दाखवून करण्यात आले.
यावेळी ओएनजीसीचे अधिकारी अभिषेक पाटील यांच्यासह सरपंच सविता मढवी, उपसरपंच प्रियदर्शनी म्हात्रे, नितीन मढवी, अविनाश म्हात्रे, आतिश भोईर आदी मान्यवर उपस्थित होते. ग्रामपंचायतीतर्फे उपस्थित अधिकाऱ्यांचा शाल व फुलझाड देऊन सत्कार करण्यात आला.
ही घंटागाडी उपलब्ध करून देण्यासाठी ओएनजीसीचे अधिकारी अभिषेक पाटील यांचे मोलाचे सहकार्य लाभले, तसेच भूमिका फाउंडेशनचे डॉ. विशाल गणर यांचेही विशेष योगदान राहिले. याबद्दल ग्रामपंचायतीतर्फे सर्वांचे आभार मानण्यात आले.
दरम्यान, शाखाप्रमुख अविनाश म्हात्रे यांनी केलेल्या सातत्यपूर्ण पाठपुराव्यामुळे ही सुविधा मिळाल्याने ग्रामस्थांकडून त्यांचे विशेष कौतुक करण्यात येत आहे.
