प्रतिनिधी :
पुणे–सोलापूर महामार्गावर अंमली पदार्थांची तस्करी करणाऱ्यांविरुद्ध यवत पोलिसांनी मोठी कारवाई करत तब्बल २० लाखांहून अधिक किमतीचा गांजा जप्त केला आहे. या कारवाईत दोन आरोपींना अटक करण्यात आली असून त्यांच्यावर एनडीपीएस (NDPS) कायद्यांतर्गत गुन्हा दाखल करण्यात आला आहे.
मिळालेल्या माहितीनुसार, मंगळवारी (दि. ३१ मार्च) रात्री उशिरा सोलापूर–पुणे महामार्गावरून गांजाची वाहतूक होणार असल्याची गोपनीय माहिती यवत पोलिसांना मिळाली होती. त्यानुसार पोलिसांनी धायगुडेवाडी हद्दीत हॉटेल दुर्गा समोर रात्री सुमारे ११.१५ वाजता सापळा रचून नाकाबंदी केली.
या वेळी संशयित पांढऱ्या रंगाच्या मारुती सुझुकी बलेनो कारची तपासणी केली असता त्यात मोठ्या प्रमाणावर गांजा आढळून आला.
जप्त मुद्देमाल:
गांजा – २९ किलो ६०० ग्रॅम (अंदाजे किंमत १४,५०,००० रुपये)
वाहन – मारुती सुझुकी बलेनो (अंदाजे किंमत ५,५०,००० रुपये)
एकूण किंमत – २०,३०,००० रुपये
आरोपी:
१) शाकीर शब्बीर पानसरे (रा. येवलेवाडी, ता. हवेली; सध्या रा. बारामती)
२) समाधान शिवाजी दाभाडे (रा. येवलेवाडी, ता. हवेली)
दोन्ही आरोपींना ताब्यात घेण्यात आले असून ते सध्या पोलीस कोठडीत आहेत.
या प्रकरणी पोलीस हवालदार गुरुनाथ गायकवाड यांनी फिर्याद दिली असून पुढील तपास सहाय्यक पोलीस निरीक्षक महेश माने करत आहेत. महामार्गावरील या धडक कारवाईमुळे अंमली पदार्थ तस्करांमध्ये भीतीचे वातावरण निर्माण झाले आहे.
