नांदेड (प्रतिनिधी) : किनवट तालुक्यातील बेल्लोरी येथील जिल्हा परिषद प्राथमिक शाळेला आग लागल्याचा व्हिडिओ सध्या सोशल मीडियावर व्हायरल होत असला, तरी ही माहिती पूर्णपणे चुकीची असल्याचे प्रशासनाने स्पष्ट केले आहे. शाळेला कोणतीही आग लागलेली नसून ती पूर्णपणे सुरक्षित आहे.
बेल्लोरी येथील शाळा परिसरात किनवट नगरपालिकेमार्फत उद्यान उभारणीचे काम सुरू आहे. या कामादरम्यान परिसरातील झाडे-झुडपे तोडून स्वच्छता करण्यात आली होती. दिनांक ६ एप्रिल रोजी रात्री अज्ञात व्यक्तीकडून एकत्रित केलेल्या कचऱ्याला आग लावण्यात आली. या आगीचा भडका मोठा असल्यामुळे तो व्हिडिओ शाळेशी संबंधित असल्याचा गैरसमज निर्माण झाला.
घटनेची माहिती मिळताच अग्निशमन दलाने तात्काळ घटनास्थळी धाव घेत आग नियंत्रणात आणली. या घटनेत शाळेचे कोणतेही नुकसान झालेले नाही.
गट शिक्षणाधिकारी अनिलकुमार महामुने यांनी शाळा सुरक्षित असल्याची माहिती देत नागरिकांनी अफवांवर विश्वास ठेवू नये व अप्रमाणित संदेश पुढे पाठवू नयेत, असे आवाहन केले आहे.
