किनवट (प्रतिनिधी) : भारतीय संविधानाचे शिल्पकार डॉ. बाबासाहेब आंबेडकर आणि समाजक्रांतीचे जनक महात्मा ज्योतिबा फुले यांच्या जयंतीनिमित्त किनवट येथे भव्य संयुक्त जयंती उत्सवाचे आयोजन करण्यात आले आहे. या उत्सवाच्या माध्यमातून विविध सामाजिक, शैक्षणिक आणि सांस्कृतिक उपक्रमांची रेलचेल पाहायला मिळणार आहे.
या उत्सवामध्ये रांगोळी स्पर्धा, रंगभरण स्पर्धा, मिरवणूक यांसारखे आकर्षक कार्यक्रम आयोजित करण्यात आले आहेत. विशेष म्हणजे रांगोळी स्पर्धेसाठी आकर्षक रोख बक्षिसे, सन्मानचिन्ह व प्रमाणपत्र देण्यात येणार आहेत.
ही रांगोळी स्पर्धा दिनांक ११ एप्रिल २०२६ रोजी गोंधराजे मैदान येथे सायंकाळी ४ ते ७ या वेळेत पार पडणार असून त्यानंतर बक्षीस वितरण सोहळा होणार आहे.
या कार्यक्रमांद्वारे समाजात एकता, बंधुता आणि सामाजिक जागृतीचा संदेश देण्याचा प्रयत्न करण्यात येत आहे. हा भव्य सोहळा रमामाचा प्रतिष्ठान, किनवट यांच्या वतीने आयोजित करण्यात आला असून, सर्व नागरिकांनी मोठ्या संख्येने उपस्थित राहून कार्यक्रमाची शोभा वाढवावी, असे आवाहन आयोजकांनी केले आहे.
