धाराशिव (प्रतिनिधी) : मोबाईलवर पाठवलेल्या लिंकच्या माध्यमातून गुंतवणुकीवर मोठा नफा मिळवून देण्याचे आमिष दाखवत एका अनोळखी व्यक्तीने धाराशिव येथील नागरिकाची तब्बल 63 लाख 50 हजार रुपयांची ऑनलाइन फसवणूक केल्याची धक्कादायक घटना उघडकीस आली आहे. याप्रकरणी सायबर पोलीस ठाण्यात गुन्हा दाखल करण्यात आला आहे.
मिळालेल्या माहितीनुसार, फिर्यादी सुशीलकुमार शिवाजीराव सड (वय 45, रा. समर्थनगर, धाराशिव) यांना 20 जानेवारी 2026 रोजी दुपारी एका अनोळखी व्यक्तीकडून मोबाईलवर लिंक पाठवण्यात आली. त्यानंतर व्हॉट्सअॅपवर संपर्क साधून संबंधिताने गुंतवणुकीवर मोठा परतावा मिळेल, असे आमिष दाखवले. विविध बनावट नफ्याचे आकडे दाखवत विश्वास संपादन करून त्यांना टप्प्याटप्प्याने पैसे गुंतवण्यास प्रवृत्त करण्यात आले.
20 जानेवारी ते 9 मार्च 2026 या कालावधीत फिर्यादींकडून वेगवेगळ्या व्यवहारांद्वारे एकूण 63,50,000 रुपये उकळण्यात आले. फसवणूक झाल्याचे लक्षात आल्यानंतर त्यांनी 6 एप्रिल रोजी सायबर पोलीस ठाण्यात तक्रार दाखल केली.
या तक्रारीवरून पोलिसांनी भारतीय न्याय संहिता कलम 318(4) तसेच माहिती तंत्रज्ञान अधिनियम 2000 मधील कलम 66 (C) व 66 (D) अंतर्गत गुन्हा नोंदवला आहे. पुढील तपास सायबर पोलीसांकडून सुरू आहे.
दरम्यान, नागरिकांनी मोबाईलवर येणाऱ्या अनोळखी लिंक, गुंतवणुकीचे आमिष किंवा सोशल मीडियावरील संशयास्पद संदेशांपासून सावध राहावे, असे आवाहन पोलिसांकडून करण्यात आले आहे.
