अक्राणी (प्रतिनिधी) : नंदुरबार जिल्ह्यातील नवापूर तालुक्यातील बंधारे येथील शासकीय आश्रमशाळेतील इयत्ता तिसरीतील विद्यार्थी ब्रायन राहूल गावीत यांच्या संशयास्पद मृत्यू प्रकरणी सखोल चौकशी करून दोषींवर गुन्हा दाखल करून त्यांना सेवेतून निलंबित करण्यात यावे, अशी मागणी बिरसा फायटर्स संघटनेच्या वतीने करण्यात आली आहे.
याबाबतचे निवेदन जिल्हाधिकारी नंदुरबार यांना देण्यात आले असून तहसीलदार तळोदा यांनाही सादर करण्यात आले. यावेळी जिल्हाध्यक्ष हिरामण खर्डे, तळोदा तालुकाध्यक्ष सुभाष पावरा, युवराज वळवी, रतीलाल पावरा, मंगला बाई पवार, मनेश खर्डे, अंजनाबाई खर्डे, करण रावताळे, हिंमत नावडे आदी कार्यकर्ते उपस्थित होते.
मिळालेल्या माहितीनुसार, ब्रायन गावीत हा विद्यार्थी ३ एप्रिल २०२६ रोजी बेपत्ता झाला होता. त्यानंतर ४ एप्रिल रोजी शाळेच्या हद्दीतील टाकीत त्याचा संशयास्पद मृतदेह आढळून आला. या घटनेमुळे परिसरात खळबळ उडाली असून पालकांनी या प्रकरणात घातपाताची शंका व्यक्त केली आहे.
शाळा प्रशासनाच्या निष्काळजीपणामुळे ही घटना घडल्याचा आरोप करण्यात येत असून आदिवासी आश्रमशाळांमधील विद्यार्थ्यांच्या सुरक्षेबाबत गंभीर प्रश्न निर्माण झाला आहे. अशा प्रकारच्या घटना वारंवार घडत असल्याने दोषींवर कठोर कारवाई होणे अत्यावश्यक असल्याचे संघटनेने नमूद केले आहे.
या प्रकरणी सखोल चौकशी करून संबंधितांवर गुन्हा दाखल करावा, अटक करावी आणि सेवेतून निलंबित करावे, अशी ठाम मागणी बिरसा फायटर्स संघटनेकडून करण्यात आली आहे.
