आजरा (प्रतिनिधी) : आजरा येथील व्यंकटराव कला, वाणिज्य व विज्ञान महाविद्यालयातील कु. मधुरा प्रकाश दळवी आणि कु. साधना महेश होसुरकर यांची नाशिक जिल्ह्यातील सिन्नर येथे होणाऱ्या राज्य अजिंक्यपद निवड चाचणी कबड्डी स्पर्धेसाठी निवड झाली आहे. या यशामुळे महाविद्यालयाच्या क्रीडा क्षेत्रातील कामगिरीत आणखी भर पडली आहे.
दरम्यान, करवीर तालुक्यातील कोथली येथे नुकत्याच पार पडलेल्या राज्यस्तरीय खुल्या महिला कबड्डी स्पर्धेत व्यंकटराव महाविद्यालयाच्या विद्यार्थिनींनी दमदार कामगिरी करत उपविजेतेपद पटकावले. चुरशीच्या सामन्यात शेवटच्या क्षणापर्यंत झुंज देत त्यांनी द्वितीय क्रमांक मिळवला.
या उल्लेखनीय यशाबद्दल संस्थेचे अध्यक्ष जयवंतराव शिंपी व संचालक मंडळाने विद्यार्थिनींचे कौतुक केले. तसेच कबड्डी प्रशिक्षक (एन.आय.एस) पी. आर. तेरसे आणि कु. पी. एल. सासुलकर यांच्या मार्गदर्शनाचे विशेष कौतुक करण्यात आले.
यावेळी संस्थेचे संचालक व उद्योगपती सचिन शिंपी यांनी मैदानावर उपस्थित राहून खेळाडू व प्रशिक्षकांचा सत्कार केला. कार्यक्रमास महाविद्यालयाचे प्राचार्य एस. व्ही. शेळके आणि प्रभारी प्राचार्य सी. एस. पन्हाळकर उपस्थित होते.
विद्यार्थिनींच्या या यशामुळे परिसरात अभिमानाचे वातावरण निर्माण झाले असून त्यांच्या पुढील स्पर्धांसाठी शुभेच्छांचा वर्षाव होत आहे.
