चंदगड (प्रतिनिधी) : जागतिक पर्यावरण दिनाच्या निमित्ताने ऐतिहासिक किल्ले पारगड येथे ‘स्टॉफ इंडिया पारगड हेरिटेज रन’ या आंतरराष्ट्रीय दर्जाच्या मॅरेथॉन स्पर्धेचे भव्य आयोजन करण्यात आले आहे. रविवार, ७ जून २०२६ रोजी होणाऱ्या या स्पर्धेत यंदा तब्बल ३ हजारांहून अधिक धावपटू सहभागी होण्याची शक्यता आहे.
या उपक्रमाचा मुख्य उद्देश पर्यावरण संवर्धनासोबतच ऐतिहासिक वारशाची जाणीव नव्या पिढीला करून देणे हा आहे. ‘निसर्गाचे रक्षक’ या संकल्पनेतून वृक्षलागवड, पाणी संवर्धन, कचरा पुनर्वापर आणि नैसर्गिक ऊर्जेचा वापर यांसारख्या मुद्द्यांवर जनजागृती केली जाणार आहे.
स्पर्धा ‘जॉय ऑफ जंगल’ (५ किमी), ‘जंगल ड्रीम रन’ (१० किमी) आणि ‘जंगल हाफ मॅरेथॉन’ (२१ किमी) अशा तीन गटांत होणार असून पुरुष व महिलांसाठी १८ स्वतंत्र वयोगट ठेवण्यात आले आहेत. विजेत्यांना एकूण १ लाख रुपयांची रोख बक्षिसे दिली जाणार असून ७ जून रोजी सकाळी ६ वाजता स्पर्धेला सुरुवात होईल.
५ ते ७ जून दरम्यान गडावर विविध कार्यक्रमांचे आयोजन करण्यात आले आहे. ५ जून रोजी प्लास्टिकमुक्त अभियान व पर्यावरण जनजागृती सत्र, ६ जून रोजी शिवराज्याभिषेक सोहळा, पारंपरिक मिरवणूक व सांस्कृतिक कार्यक्रम होणार आहेत. विशेष आकर्षण म्हणून ‘कोअर हेरिटेज’ संस्थेमार्फत राकेशराव धावडे यांच्या मार्गदर्शनाखाली ऐतिहासिक शस्त्रास्त्रांचे भव्य प्रदर्शन भरवण्यात येणार आहे.
या स्पर्धेला स्टॉफ इंडियाचे सीईओ बिपीन चिर्मुरे, आमदार शिवाजीराव पाटील, माजी आमदार राजेश पाटील तसेच वन विभाग, पोलीस प्रशासन व विविध क्रीडा संस्थांचे सहकार्य लाभले आहे.
सहभागी धावपटूंना प्रमाणपत्र, पदक, टी-शर्ट आणि फळझाडाचे रोपटे दिले जाणार असून कोल्हापूर जिल्ह्यातील विद्यार्थ्यांसाठी प्रवेश विनामूल्य ठेवण्यात आला आहे. अधिक माहितीसाठी स्पर्धकांनी www.pargad.in या संकेतस्थळाला भेट द्यावी, असे आवाहन स्पर्धा प्रमुख प्रवीण चिर्मुरे आणि सल्लागार सदस्य श्रीकांत पाटील यांनी केले आहे.
