शहादा (प्रतिनिधी) : शिवसेनेचे नंदुरबार जिल्हाप्रमुख राम चंद्रकांत रघुवंशी यांच्या वाढदिवसानिमित्त शहादा येथे गरजू मजुरांसाठी ‘जेवण टिफिन’ वाटपाचा स्तुत्य उपक्रम राबविण्यात आला. मंगळवारी (दि. ७) शहादा तालुका जनसंपर्क कार्यालयात हा कार्यक्रम पार पडला.
राजकीय जल्लोषाऐवजी सामाजिक बांधिलकी जपत हा वाढदिवस साजरा करण्यात आला. शिवसेना तालुकाप्रमुख मनलेश जायसवाल यांच्या पुढाकारातून या उपक्रमाचे आयोजन करण्यात आले होते. शहादा परिसरात पपई, केळी, मिरची तोडणीसाठी येणाऱ्या कष्टकरी मजुरांना कामाच्या ठिकाणी जेवणाची सोय होत नसल्याची अडचण लक्षात घेऊन त्यांना सकस ‘तीन ताली’ जेवणाचे टिफिन वाटप करण्यात आले.
या कार्यक्रमाला शहरप्रमुख जितेंद्र जमदाडे, जिल्हा युवासेना उपप्रमुख राजरत्न बिरारे, डॉ. राजेंद्र पेंढारकर, जयेश निकम, गोपाल कोळी, लक्ष्मण पवार, कौस्तुभ मोरे, जगदीश ठाकरे, अशोक वसावे, कल्पेश डांगळे, विजय गायकवाड, आप्पा नगराळे, नंदू चव्हाण, यतीश पाटील यांच्यासह अनेक मान्यवर उपस्थित होते.
हार-तुरे आणि बॅनरबाजी टाळून गरजूंच्या मदतीसाठी पुढे येण्याच्या या उपक्रमाचे सर्वत्र कौतुक होत असून, मजुरीसाठी वणवण करणाऱ्या कामगारांना यामुळे मोठा दिलासा मिळाला. समाजाभिमुख पद्धतीने वाढदिवस साजरा करण्याची ही संकल्पना इतरांसाठी प्रेरणादायी ठरत असल्याच्या भावना यावेळी व्यक्त करण्यात आल्या.
