बिलोली (प्रतिनिधी) : रामतीर्थ पोलीस ठाण्याच्या हद्दीत देगलूर रोडवरील एका लॉजवर पोलिसांनी छापा टाकत देहविक्री प्रकरणाचा पर्दाफाश केला असून सहा पीडित महिलांची सुटका करण्यात आली आहे. या प्रकरणी दोघांविरुद्ध पिटा (PITA) कायद्यानुसार गुन्हा दाखल करण्यात आला आहे.
मिळालेल्या माहितीनुसार, नरसी ते शंकरनगर रोडवरील राजबार अँड रेस्टॉरंट येथे देहविक्रीचा व्यवसाय सुरू असल्याची गोपनीय माहिती पोलिसांना मिळाली होती. त्यानुसार पोलिसांनी डमी ग्राहक पाठवून माहितीची खातरजमा केली. त्यानंतर दोन पंचांच्या उपस्थितीत छापा टाकण्यात आला.
छाप्यात पहिल्या मजल्यावरील खोलीत पीडित महिलांसह संतोष श्रीपत पवळे (वय ३०) आणि शिवराज श्रीपत पवळे (वय ३५, रा. बालाजी नगर, नरसी) आढळून आले. चौकशीत सोहेल शेख (रा. पनवेल, मुंबई) हा महिलांना देहविक्रीस प्रवृत्त करत असल्याचे समोर आले.
या कारवाईत पोलिसांनी रोख ४७,५०० रुपये, सहा मोबाईल फोन तसेच MH 26 6411 क्रमांकाची कार असा मुद्देमाल जप्त केला आहे. सुटका करण्यात आलेल्या सहा महिलांची वैद्यकीय तपासणी करून त्यांना पुढील मदत व पुनर्वसनासाठी संबंधित संस्थेकडे सुपूर्द करण्यात आले आहे.
या प्रकरणी रामतीर्थ पोलीस ठाण्यात गुन्हा नोंद करण्यात आला असून पुढील तपास सुरू आहे. ही कारवाई सहाय्यक पोलीस निरीक्षक शिव्वे, पोलीस उपनिरीक्षक गजानन तोटावार तसेच अनिल रिंदकवाले, भगवान कोत्तापल्ले, भार्गव सुवर्णाकार आदींच्या पथकाने केली.
