हिंगणघाट प्रतिनिधी: हिंगणघाट विधानसभा क्षेत्रातील सिंदी-रेल्वे येथील प्राथमिक आरोग्य केंद्राला ग्रामीण रुग्णालयाचा दर्जा मिळवून देण्याचा प्रश्न आता मार्गी लागण्याच्या दिशेने पुढे सरकत असल्याचे चित्र दिसत आहे. यासंदर्भात राज्याचे आरोग्यमंत्री प्रकाश आंबीटकर यांची रोहित पवार आणि वर्धा जिल्हाध्यक्ष अतुल वांदिले यांनी भेट घेऊन सविस्तर व सकारात्मक चर्चा केली.
सिंदी-रेल्वे परिसरातील नागरिकांना दर्जेदार आरोग्य सुविधा मिळाव्यात, यासाठी प्राथमिक आरोग्य केंद्राचे ग्रामीण रुग्णालयात श्रेणीवर्धन व्हावे, ही मागणी अनेक वर्षांपासून प्रलंबित आहे. या मागणीला राजकीय स्तरावरही पाठबळ मिळाले असून जयंत पाटील आणि शशिकांत शिंदे यांनी सभागृहात हा मुद्दा उपस्थित केला होता.
दरम्यान, २१ फेब्रुवारी २०२६ रोजी सिंदी-रेल्वे येथे पार पडलेल्या ‘रक्ताने पत्र’ आंदोलनामुळे या मागणीला नवे वळण मिळाले. अमोल सोनटक्के आणि आशिष देवतळे यांच्या नेतृत्वाखाली सुमारे १५०० नागरिकांनी स्वतःच्या रक्ताने मुख्यमंत्री देवेंद्र फडणवीस यांना पत्र लिहून आंदोलन केले होते.
या पार्श्वभूमीवर आरोग्य राज्यमंत्री मेघना साकोरे-बोर्डीकर यांनीही सभागृहात सकारात्मक निर्णय घेण्याची ग्वाही दिली होती.
अलीकडील बैठकीत सिंदी-रेल्वे परिसरातील आरोग्य सुविधांचा अभाव, रुग्णांची गैरसोय आणि प्रशासकीय दिरंगाई यावर सखोल चर्चा करण्यात आली. यावेळी सुनिल राऊत, नितेश कराळे यांच्यासह अन्य पदाधिकारी उपस्थित होते.
या चर्चेनंतर सिंदी-रेल्वे येथे ग्रामीण रुग्णालय मंजुरीच्या प्रक्रियेला गती मिळण्याची शक्यता असून, लवकरच सकारात्मक निर्णय होण्याची अपेक्षा व्यक्त केली जात आहे. स्थानिक नागरिकांसाठी हा निर्णय मोठा दिलासा ठरणार आहे.
