कन्नड तालुका | प्रतिनिधी
कन्नड तालुक्यातील ताडपिंपळगाव येथील प्रगतशील युवा शेतकरी सागर राजेंद्र सोनवणे यांनी आपल्या कर्तृत्वाने गावाचा नावलौकिक राज्यभर पोहोचवला आहे. दूरदर्शनच्या सह्याद्री वाहिनीवरील लोकप्रिय कार्यक्रमात ‘माझी आधुनिक शेती’ या विषयावर त्यांची विशेष मुलाखत प्रसारित झाली असून, त्यांच्या कार्याचे सर्वत्र कौतुक होत आहे.
या मुलाखतीत सागर सोनवणे यांनी शेतीतील आधुनिक तंत्रज्ञानाचा वापर, कमी खर्चात अधिक उत्पादन घेण्याच्या पद्धती, तसेच सिंचन व्यवस्थेतील नवकल्पना याविषयी सविस्तर माहिती दिली. पारंपरिक शेतीला आधुनिकतेची जोड देत त्यांनी आपल्या शेतीत केलेले प्रयोग आणि त्यातून मिळवलेले यश प्रभावीपणे मांडले.
आजच्या काळात अनेक तरुण नोकरीकडे वळत असताना, सागर यांनी शेती क्षेत्रात घेतलेली भरारी प्रेरणादायी ठरत आहे. “शेतीत मेहनत आणि विज्ञानाची सांगड घातली, तर मातीतूनही सोनं पिकवता येतं,” असा विश्वास त्यांनी व्यक्त केला.
त्यांच्या या उल्लेखनीय कार्याबद्दल ताडपिंपळगाव ग्रामस्थांसह विविध क्षेत्रातील मान्यवरांकडून त्यांचे अभिनंदन करण्यात येत आहे. सागर सोनवणे यांच्या यशामुळे गावाचे नाव राज्यपातळीवर झळकले असून, ग्रामीण भागातील तरुणांसाठी ते प्रेरणास्थान ठरत आहेत.
