प्रतिनिधी :- रमेश मुलगीर
मानवत तालुक्यातील मांडेवडगाव येथील जिल्हा परिषद शाळेत ४ एप्रिल रोजी एक प्रेरणादायी शैक्षणिक उपक्रम पार पडला. पोहंडुळ जिल्हा परिषद शाळेचे मुख्याध्यापक श्री. सूर्यकांत एकनाथ हेळंबे यांनी आपल्या प्रथम नियुक्तीच्या स्मृती प्रित्यर्थ विद्यार्थ्यांना शालेय साहित्याचे वाटप करत एक आदर्श निर्माण केला.
या कार्यक्रमाचे आयोजन शालेय व्यवस्थापन समितीचे अध्यक्ष श्री. सचिन आनंदराव शेळके यांच्या हस्ते करण्यात आले. यावेळी इयत्ता १ ली ते ५ वी मधील ५५ विद्यार्थ्यांना तसेच अंगणवाडीतील २० चिमुकल्यांना शालेय गणवेश, वह्या, पेन आणि बिस्किटांचे वाटप करण्यात आले.
आपल्या सेवेला सुरुवात झालेल्या क्षणांच्या आठवणी जपताना समाजाप्रती आपली जबाबदारी ओळखून श्री. हेळंबे यांनी घेतलेला हा पुढाकार विद्यार्थ्यांसाठी प्रेरणादायी ठरत आहे.
या प्रसंगी गावातील मान्यवर व शिक्षणप्रेमी नागरिक श्री. राजीव आत्माराम होंडे, सरपंच श्री. सखाराम शेळके, श्री. मंचक होंडे यांची प्रमुख उपस्थिती होती. तसेच अंगणवाडी सेविका उषाबाई आणि शाळेचे मुख्याध्यापक श्री. चव्हाण यांनी या उपक्रमाचे मनापासून कौतुक केले.
श्री. सूर्यकांत हेळंबे यांच्या या दातृत्वपूर्ण उपक्रमाचे संपूर्ण परिसरातून अभिनंदन होत असून, त्यांच्या शैक्षणिक कार्याचा आदर्श इतरांसाठी प्रेरणादायी ठरत आहे.
