बार्शी तालुका प्रतिनिधी
बार्शी तालुक्यातील ढोराळे येथील कट्टर शिवसैनिक प्रवीण उर्फ अमोल लक्ष्मण काकडे यांची सोलापूर जिल्हा (उबाठा) शिवसेना प्रमुखपदी निवड करण्यात आली आहे. त्यांच्या या निवडीमुळे बार्शी तालुक्यासह संपूर्ण जिल्ह्यातील शिवसैनिकांमध्ये आनंदाचे वातावरण निर्माण झाले आहे.
हिंदूहृदयसम्राट बाळासाहेब ठाकरे यांच्या विचारांनी प्रेरित होऊन प्रवीण काकडे यांनी राजकारणात सक्रिय सहभाग घेतला. त्यांनी बार्शी तालुका प्रमुख म्हणून काम करताना संघटन बळकट करण्यासाठी मोठे योगदान दिले आहे.
गेल्या १५ वर्षांमध्ये त्यांनी बार्शी विधानसभा, धाराशिव लोकसभा, तालुका पंचायत समिती आणि जिल्हा परिषद निवडणुकांमध्ये सक्रिय भूमिका बजावली आहे. ग्रामीण भागातील एक सक्षम व उदयोन्मुख नेतृत्व म्हणून त्यांच्याकडे पाहिले जात आहे.
कोरोना काळ, अतिवृष्टीसारख्या संकटांमध्ये त्यांनी सर्वसामान्य नागरिकांना मदत केली. शिवसंपर्क अभियान, शेतकऱ्यांसाठी पीक कर्ज मार्गदर्शन, तसेच मोफत आरोग्य तपासणी शिबिर यांसारख्या उपक्रमांमुळे त्यांनी जनतेमध्ये आपली वेगळी ओळख निर्माण केली आहे.
त्यांच्या कार्याची दखल घेत उद्धव ठाकरे, आदित्य ठाकरे तसेच जिल्हा संपर्कप्रमुख सुषमा अंधारे यांनी त्यांच्यावर जिल्हाप्रमुख पदाची जबाबदारी सोपवली आहे.
प्रवीण काकडे यांच्या संघटन कौशल्याचा व अनुभवाचा सोलापूर जिल्ह्यातील शिवसेनेला मोठा फायदा होईल, अशी अपेक्षा व्यक्त होत असून जिल्हाभरातून त्यांच्यावर अभिनंदनाचा वर्षाव होत आहे.
