किल्ले धारूर( प्रतिनिधी)
किल्ले धारूर येथील ऋतुजा अशोक नाईकनवरे या कन्येने आपल्या जिद्द, मेहनत आणि चिकाटीच्या जोरावर उल्लेखनीय यश संपादन करत परिसराचा अभिमान वाढवला आहे. महाराष्ट्र लोकसेवा आयोग (MPSC) परीक्षेत ओबीसी प्रवर्गातून राज्यात १७ वा क्रमांक मिळवत तिने टॅक्स असिस्टंट या पदावर यश मिळवले असून तिचे सर्वत्र कौतुक होत आहे.
किल्ले धारूर शहरातील ऋतुजा नाईकनवरे हिने नुकत्याच जाहीर झालेल्या एमपीएससीच्या टॅक्स असिस्टंट पदाच्या निकालात घवघवीत यश संपादन केले. तिच्या या यशामुळे शहरासह परिसरात आनंदाचे वातावरण निर्माण झाले आहे.तिच्या शैक्षणिक प्रवासाची सुरुवात कोळपिंपरी येथील महात्मा फुले आश्रम शाळेत झाली. त्यानंतर तिने किल्ले धारूर येथील हुतात्मा पापा सिंग माध्यमिक शाळेत माध्यमिक शिक्षण पूर्ण केले. पुढे राष्ट्रमाता जिजाऊ कला वाणिज्य महाविद्यालयात शिक्षण घेत तिने पदवी प्राप्त केली.
स्पर्धा परीक्षेच्या तयारीसाठी तिने पुणे येथे जाऊन युनिक MPSC क्लासेसमध्ये मार्गदर्शन घेतले. योग्य दिशा, सातत्यपूर्ण अभ्यास आणि कठोर परिश्रम यांच्या जोरावर तिने हे यश मिळवले.ग्रामीण भागातील विद्यार्थ्यांसाठी तिचे यश प्रेरणादायी ठरत आहे. “जिद्द आणि चिकाटी असेल तर कोणतेही लक्ष्य गाठता येते,” हा संदेश तिच्या यशातून स्पष्ट झाला आहे.तिच्या या उल्लेखनीय यशाबद्दल सर्व स्तरांतून अभिनंदन होत असून, पुढील वाटचालीसाठी तिला हार्दिक शुभेच्छा देण्यात येत आहेत.
