औंढा/हिंगोली : प्रतिनिधी
मराठवाड्यातील हिंगोली जिल्ह्यासह औंढा, दुघाळा आणि आसपासच्या परिसरात आज सकाळी भूकंपाचे जोरदार धक्के जाणवले. सकाळी ठिक 8 वाजून 45 मिनिटांनी अचानक जमीन हादरल्याने नागरिकांमध्ये मोठी भीती पसरली.
या धक्क्यांचा प्रभाव औंढा, दुघाळा तसेच वसमत, हिंगोली आणि आसपासच्या भागांत जाणवला. काही क्षणांतच लोक घराबाहेर धावत आल्याचे चित्र पाहायला मिळाले.
तसेच नांदेड व परभणी जिल्ह्यांमध्येही धक्क्याची तीव्रता जाणवल्याची प्राथमिक माहिती मिळत आहे. अचानक झालेल्या या प्रकारामुळे काही काळ दहशतीचे वातावरण निर्माण झाले होते.
सुदैवाने अद्याप कोणतीही जीवित किंवा मोठ्या वित्तहानीची अधिकृत माहिती समोर आलेली नाही. प्रशासनाकडून परिस्थितीवर लक्ष ठेवण्यात येत असून नागरिकांना अफवांवर विश्वास न ठेवता सतर्क राहण्याचे आवाहन करण्यात आले आहे.
भूकंपाच्या या धक्क्यामुळे परिसरात काही वेळासाठी जनजीवन विस्कळीत झाले होते.
