कन्नड (प्रतिनिधी) : क्रांतीसूर्य, थोर समाजसुधारक आणि सत्यशोधक समाजाचे संस्थापक महात्मा ज्योतिबा फुले यांची जयंती आज ११ एप्रिल २०२६ रोजी ताडपिंपळगाव आणि देवगाव रंगारी येथे मोठ्या उत्साहात व भक्तीमय वातावरणात साजरी करण्यात आली.
सकाळपासूनच दोन्ही गावांमध्ये जयंतीनिमित्त उत्साहाचे वातावरण पाहायला मिळाले. सार्वजनिक ठिकाणे, शाळा व विविध संस्थांमध्ये महात्मा फुले यांच्या प्रतिमेचे पूजन करून त्यांना अभिवादन करण्यात आले. “महात्मा फुले यांचा विजय असो” आणि “क्रांतीसूर्य ज्योतिबा फुले यांचा जयजयकार” अशा घोषणांनी परिसर दुमदुमून गेला होता.
या कार्यक्रमाला गावातील सरपंच, उपसरपंच, ग्रामपंचायत सदस्य, विविध संस्थांचे पदाधिकारी तसेच ग्रामस्थ मोठ्या संख्येने उपस्थित होते. “महात्मा फुलेंचे सत्यशोधक विचार आजही समाजाला दिशा देणारे आहेत,” अशा भावना मान्यवरांनी व्यक्त केल्या.
तसेच देवगाव रंगारी व ताडपिंपळगाव येथील तरुणांनी एकत्र येत भव्य रॅलीचे आयोजन केले होते. या जयंती उत्सवामुळे संपूर्ण परिसरात सामाजिक एकतेचा आणि आनंदाचा माहोल निर्माण झाला होता.
