जालना, दि.२४ (जिमाका) – जिल्ह्यात बालिकांच्या सक्षमीकरणासाठी राबविण्यात येणाऱ्या ‘लेक लाडकी’ योजनेला मोठा प्रतिसाद मिळत असून, आतापर्यंत ५ हजार ३१२ मुलींना या योजनेचा लाभ मिळाला आहे, अशी माहिती जिल्हा परिषदेच्या महिला व बाल विकास अधिकारी सौ. कोमल कोरे यांनी दिली.
जिल्हा परिषदेमार्फत महिला व बाल विकास विभागाच्या वतीने ही योजना प्रभावीपणे राबविण्यात येत आहे. मुलींच्या जन्माचे स्वागत करणे, स्त्री-भ्रूणहत्या रोखणे, बालविवाहाला आळा घालणे आणि मुलींच्या शिक्षणाला चालना देणे हा या योजनेचा मुख्य उद्देश आहे. या योजनेअंतर्गत पात्र कुटुंबातील मुलींना जन्मापासून ते शिक्षणाच्या विविध टप्प्यांपर्यंत टप्प्याटप्प्याने आर्थिक सहाय्य दिले जाते.
योजनेनुसार मुलीच्या जन्मानंतर ५ हजार रुपये, इयत्ता पहिलीत ६ हजार रुपये, सातवीत ७ हजार रुपये, अकरावीत ८ हजार रुपये, तर १८ वर्षे पूर्ण झाल्यानंतर ७५ हजार रुपये असे एकूण १ लाख १ हजार रुपयांचे आर्थिक सहाय्य दिले जाते.
या योजनेमुळे जिल्ह्यात मुलींच्या जन्मदरात वाढ होण्यास मदत होत असून, त्यांच्या शिक्षणाबाबत कुटुंबांमध्ये सकारात्मक दृष्टिकोन निर्माण होत आहे. ‘लेक लाडकी’ योजना ही केवळ आर्थिक मदत न राहता समाजातील मुलींबाबतचा दृष्टिकोन बदलण्याचे महत्त्वपूर्ण पाऊल ठरत असल्याचेही कोरे यांनी नमूद केले. मुलगी ही कुटुंबाची ‘लाडकी’ बनत असल्याचे चित्र या योजनेमुळे अधिक ठळकपणे दिसून येत आहे.
