पनवेल (प्रतिनिधी):
पनवेल तालुक्यातील तळोजा MIDC परिसरातील साफोर्ड ली (SA-FORD) कंपनीतील कामगारांसाठी आनंदाची बातमी समोर आली आहे. कामगार नेते महेंद्रशेठ घरत यांच्या नेतृत्वाखालील न्यू मॅरीटाईम अँड जनरल कामगार संघटनेने कंपनी व्यवस्थापनासोबत यशस्वी पगारवाढ करार केला आहे.
दिनांक २१ एप्रिल रोजी झालेल्या या करारानुसार, कामगारांना पुढील तीन वर्षांसाठी एकूण ₹११,००० रुपयांची भरघोस पगारवाढ मंजूर करण्यात आली आहे. याशिवाय, कामगारांना एक ग्रॉस सॅलरी इतका बोनस देण्यासही व्यवस्थापनाने सहमती दर्शवली आहे.
या करारामध्ये कामगारांच्या हिताच्या विविध तरतुदी करण्यात आल्या असून, सर्व कामगारांसाठी मेडिक्लेम पॉलिसी तसेच इतर आवश्यक सोयी-सुविधांचा समावेश करण्यात आला आहे. त्यामुळे कामगारांच्या सामाजिक आणि आर्थिक सुरक्षिततेत वाढ होणार आहे.
कामगार नेते महेंद्रशेठ घरत हे राष्ट्रीय व आंतरराष्ट्रीय स्तरावर कामगारांचे नेतृत्व करत असून, स्थानिक भूमिपुत्र कामगारांना न्याय मिळवून देण्यासाठी सातत्याने प्रयत्नशील आहेत. या कंपनीतील कामगारांनी पूर्वीच्या संघटनांना राजीनामा देत घरत यांच्या संघटनेवर विश्वास व्यक्त केला होता, ज्याचे फळ या ऐतिहासिक कराराच्या रूपाने मिळाल्याची भावना कामगारांमध्ये व्यक्त होत आहे.
या करारामुळे तळोजा औद्योगिक क्षेत्रातील कामगारांमध्ये समाधान आणि आनंदाचे वातावरण निर्माण झाले असून, त्यांच्या जीवनमानात सकारात्मक बदल होण्याची अपेक्षा व्यक्त केली जात आहे.
