वार्ताहर : दहेगाव
मुख्यमंत्री ग्राम सडक योजनेअंतर्गत देवधरी फाटा ते दहेगाव रस्त्याच्या निकृष्ट दर्जाच्या कामाबाबत तात्काळ चौकशी, काम बंद व संबंधितांवर कठोर कारवाई करण्याबाबत दहेगाव येथील ग्रामस्थानी तक्रारिचे निवेदन दिले.
मुख्यमंत्री ग्राम सडक योजनेअंतर्गत मंजूर झालेल्या देवधरी फाटा ते दहेगाव या अत्यंत महत्त्वाच्या रस्त्याचे बांधकाम सध्या सुरू आहे. मात्र प्रत्यक्ष पाहणीअंती असे निदर्शनास येत आहे की, सदर काम अत्यंत निकृष्ट दर्जाचे होत असून आवश्यक तांत्रिक निकष व गुणवत्तेचे पालन होत नाही. यामुळे ग्रामस्थांमध्ये तीव्र नाराजी निर्माण झाली आहे . दहेगावात कमिशन मजबूत , रस्ता कमकुवत झाला असून याबाबत रस्त्या बांधकामामध्ये मोठ्याप्रमाणात भ्रष्टाचार झाला असल्याचा आरोप गावकऱ्यांनी व्यक्त केला आहे.
दहेगाव येथे मुख्यमंत्री ग्राम सडक योजनेअंतर्गत करण्यात आलेल्या रस्त्याच्या कामात मोठ्या प्रमाणात भ्रष्टाचार झाल्याचा आरोप ग्रामस्थांकडून होत आहे. लाखो रुपयांचा निधी खर्च करूनही रस्ता काही महिन्यांतच उखडू लागल्याने कामाच्या दर्जावर प्रश्नचिन्ह निर्माण झाले आहे.
स्थानिकांनी संबंधित ठेकेदार व अधिकाऱ्यांवर कारवाई करण्याची मागणी केली असून, संपूर्ण कामाची चौकशी व्हावी अशी मागणी जोर धरत आहे. मात्र अद्याप प्रशासनाकडून कोणतीही ठोस कारवाई झालेली नाही. त्यामुळे
मुख्यमंत्री ग्राम सडक योजनेवर प्रश्न चिन्ह उमटले आहे .
सदर रस्ता हा दहेगावसाठी जीवनवाहिनीच मानला जातो. ग्रामस्थ, शेतकरी, विद्यार्थी, महिला, ज्येष्ठ नागरिक तसेच आपत्कालीन सेवांसाठी (रुग्णवाहिका इ.) हा एकमेव प्रमुख मार्ग आहे. असे असताना संबंधित ठेकेदाराकडून कोणतीही पर्यायी रस्त्याची व्यवस्था करण्यात आलेली नाही. परिणामी नागरिकांना प्रचंड गैरसोय, त्रास व जीवितास धोका निर्माण झाला आहे. येणाऱ्या पावसाळ्यात ही परिस्थिती अधिकच बिकट होण्याची दाट शक्यता नाकारता येत नाही.
या बाबतचे निवेदन दहेगाव येथील युवराज चटकी (शिवसेना विभाग प्रमुख वडकी),रामाजी डाहुले ,प्रशांत काकडे ,सागर पावडे ,सुमित भुते,कुणाल हरबडे ,अक्षय हरबडे ,तेजस डाहुले,अनिकेत बदखल
यांनी तक्रारी चे निवेदन जिल्हाधिकारी साहेबाना दिले आहे
