शहादा, दि. २६ (प्रतिनिधी) : शहादा शहरातील खेतिया रोड चार रस्ता परिसरात गेल्या अनेक वर्षांपासून पारंपरिक व्यवसाय करणाऱ्या चर्मकार समाज बांधवांनी दुकानांची जागा वाढवून देण्याची मागणी करत उपनगराध्यक्षा सौ. माधवीताई मकरंद पाटील यांना निवेदन सादर केले.
गेल्या सुमारे ५० वर्षांपासून या परिसरात चर्मकार समाजाचे बांधव बूट-चप्पल दुरुस्ती व विक्रीचा व्यवसाय करत आहेत. सध्या त्यांची दुकाने केवळ ४x४ फुटांच्या जागेत असून ती व्यवसायासाठी अपुरी ठरत आहेत. यामुळे व्यावसायिकांना साहित्य ठेवताना तसेच ग्राहकांना सेवा देताना मोठ्या अडचणींचा सामना करावा लागत आहे.
निवेदनात नमूद केल्याप्रमाणे, दुकानांची जागा कमी असल्याने ग्राहकांना रस्त्यावर उभे राहून सेवा घ्यावी लागते. त्यामुळे उन्हापावसाचा त्रास होण्यासोबतच वाहतुकीलाही अडथळा निर्माण होतो. ही समस्या दूर करण्यासाठी दुकानांच्या मागील बाजूस असलेल्या पालिकेच्या पाण्याच्या टाकीजवळील मोकळ्या जागेतून किमान ५ फूट जागा वाढवून द्यावी, अशी मागणी करण्यात आली आहे.
व्यावसायिकांनी स्पष्ट केले की, संबंधित ठिकाणी कोणतेही पक्के बांधकाम नसल्याने जागा वाढवून दिल्यास पालिकेचे नुकसान होणार नाही. उलट, वाढीव जागेसाठी नियमांनुसार अतिरिक्त कर भरण्यास ते तयार असल्याचे त्यांनी सांगितले. यामुळे व्यवसाय अधिक शिस्तबद्ध होईल आणि शहराचे सौंदर्यही अबाधित राहील, असा विश्वास त्यांनी व्यक्त केला.
हे निवेदन चर्मकार समाजाचे अध्यक्ष तथा माजी नगरसेवक हिरालाल सोमा अहिरे, सचिव तुकाराम गबा अहिरे यांच्यासह अनेक समाज बांधवांच्या उपस्थितीत सादर करण्यात आले.
दरम्यान, उपनगराध्यक्षा सौ. माधवीताई पाटील यांनी या मागणीबाबत सकारात्मक भूमिका घेत लवकरच योग्य ती कार्यवाही करण्याचे आश्वासन दिले आहे.
