शहादा, दि. २६ (प्रतिनिधी) : नुकताच जाहीर झालेल्या JEE Main 2026 परीक्षेच्या निकालात पूज्य साने गुरुजी विद्या प्रसारक मंडळाच्या कला, विज्ञान व वाणिज्य कनिष्ठ महाविद्यालयातील विद्यार्थ्यांनी उल्लेखनीय यश संपादन केले आहे. निखिल चौधरी व मितेश पाटील या विद्यार्थ्यांनी उच्च गुण मिळवत महाविद्यालयाचा नावलौकिक वाढवला आहे.
निखिल किरण चौधरी याने ९९.१५९ पर्सेंटाइल गुण मिळवत अखिल भारतीय स्तरावर इतर मागास प्रवर्गातून ३३५० वा क्रमांक पटकावला आहे. तर मितेश ज्ञानेश्वर पाटील याने ९८.५३४ पर्सेंटाइल गुण मिळवत ६३२९ वा क्रमांक मिळवला आहे. या दोन्ही विद्यार्थ्यांनी पुढील टप्प्यातील JEE Advanced परीक्षेसाठी पात्रता मिळवली आहे.
देशातील प्रतिष्ठित Indian Institutes of Technology आणि National Institutes of Technology सारख्या अभियांत्रिकी संस्थांमध्ये प्रवेशासाठी ही परीक्षा अत्यंत महत्त्वाची मानली जाते. दरवर्षी लाखो विद्यार्थी या स्पर्धात्मक परीक्षेत सहभागी होत असतात. अशा परिस्थितीत ग्रामीण भागातील विद्यार्थ्यांनी मिळवलेले हे यश विशेष उल्लेखनीय ठरले आहे.
या यशाबद्दल संस्थेचे अध्यक्ष बापूसाहेब दीपकभाई पाटील, उपाध्यक्ष जगदीशभाई पाटील, समन्वयक प्रा. मकरंद पाटील तसेच संचालक मयूर पाटील यांनी विद्यार्थ्यांचे अभिनंदन केले. महाविद्यालयाचे प्राचार्य डॉ. एम. के. पटेल, उपप्राचार्या प्रा. कल्पना पटेल, पर्यवेक्षक प्रा. के. एच. नागेश व प्रा. व्ही. सी. डोळे यांनीही विद्यार्थ्यांच्या परिश्रमाचे कौतुक करत पुढील वाटचालीस शुभेच्छा दिल्या.
विद्यार्थ्यांच्या या यशामुळे परिसरात आनंदाचे वातावरण पसरले असून इतर विद्यार्थ्यांसाठीही प्रेरणादायी उदाहरण निर्माण झाले आहे.
