शहादा, दि. २६ : राष्ट्रवादी काँग्रेस पक्षाचे नंदुरबार जिल्हाध्यक्ष डॉ. अभिजित दिलीपराव मोरे यांना विधान परिषदेवर संधी द्यावी, अशी मागणी शहादा शहराध्यक्ष सुरेंद्र ओंकार कुवर यांनी माजी मंत्री तथा उत्तर महाराष्ट्र प्रभारी आ. अनिलदादा पाटील यांच्याकडे लेखी निवेदनाद्वारे केली आहे.
निवेदनात नमूद केल्याप्रमाणे, डॉ. अभिजित मोरे यांनी मागील पाच वर्षांत जिल्ह्यात पक्षसंघटना मजबूत करण्यासाठी महत्त्वपूर्ण भूमिका बजावली असून त्यांच्या नेतृत्वाखाली नंदुरबार जिल्ह्यात पक्षाला नवसंजीवनी मिळाली आहे. नवापूर व तळोदा नगरपालिकांमध्ये राष्ट्रवादी काँग्रेसला मिळालेला विजय हा त्यांच्या कुशल नियोजनाचा परिणाम असल्याचेही निवेदनात म्हटले आहे.
डॉ. मोरे यांच्या कुटुंबाची पक्षाशी असलेली निष्ठा दीर्घकालीन असून त्यांच्या वडिलांनी व आजीनेही पक्षसंघटनेत महत्त्वाचे योगदान दिल्याचा उल्लेखही करण्यात आला आहे. २०१५ ते २०२१ या कालावधीत पक्षाची स्थिती खालावलेली असताना, २०२१ मध्ये त्यांनी जिल्हाध्यक्षपद स्वीकारल्यानंतर संघटनेत पुन्हा उत्साह निर्माण झाल्याचे नमूद करण्यात आले आहे.
नंदुरबार जिल्ह्यातील सर्व विधानसभा मतदारसंघ अनुसूचित जमातीसाठी राखीव असल्याने डॉ. अभिजित मोरे यांना थेट निवडणूक लढविण्याची संधी उपलब्ध नसल्याचेही निवेदनात स्पष्ट करण्यात आले आहे. त्यामुळे त्यांच्या कार्याची दखल घेऊन त्यांना विधान परिषदेवर संधी द्यावी, अशी कार्यकर्त्यांची भावना असल्याचे सांगण्यात आले.
“निष्ठावंत कार्यकर्त्यांचा सन्मान होणे आवश्यक आहे. डॉ. अभिजित मोरे यांची विधान परिषदेवर नियुक्ती ही कार्यकर्त्यांच्या भावना व पक्षनिष्ठेचा सन्मान ठरेल,” असे मत सुरेंद्र कुवर यांनी व्यक्त केले आहे.
या निवेदनावेळी शहादा तालुकाध्यक्ष संतोष पराडके, माजी जिल्हा परिषद सदस्य मोहन शेवाळे, छोटूभाऊ कुवर, संजय खंदारे, चिंतामण पाटील, डॉ. जितेंद्र भंडारी, रणसिंग दादा, रविंद्र जावरे यांच्यासह अनेक पदाधिकारी उपस्थित होते.
