कन्नड (प्रतिनिधी)
आखातातील युद्धजन्य परिस्थितीचा परिणाम आता स्थानिक स्तरावरही जाणवू लागला असून गॅस टंचाईमुळे हॉटेल व्यवसाय अडचणीत आला आहे. कन्नड तालुक्यातील हॉटेल चालक व मालकांना स्वयंपाकासाठी आवश्यक गॅस मिळण्यात अडचणी येत असल्याने त्यांची मोठी कसरत सुरू आहे.
हॉटेल व्यवसाय सुरळीत चालवण्यासाठी दरमहा साधारण २ ते ३ गॅस सिलिंडरची आवश्यकता असते. मात्र सध्या गॅस टंचाईमुळे नियमित पुरवठा होत नसल्याने हॉटेल व्यवसायावर मोठा परिणाम होत आहे. यामुळे केवळ हॉटेल मालकच नव्हे, तर आचारी, वेटर आणि इतर कामगारांवरही उपासमारीची वेळ येण्याची शक्यता निर्माण झाली आहे.
या पार्श्वभूमीवर हॉटेल असोसिएशनचे अध्यक्ष सिद्दार्थ निकाळजे यांनी जिल्हाधिकारी व तहसीलदार यांच्याकडे निवेदन देऊन हॉटेल चालकांना तात्काळ पीएनजी (पाइप्ड नॅचरल गॅस) सुविधा उपलब्ध करून देण्याची मागणी केली आहे.
“गॅस टंचाईमुळे व्यवसाय ठप्प होण्याच्या मार्गावर आहे. त्यामुळे प्रशासनाने तातडीने हस्तक्षेप करून हॉटेल व्यावसायिकांना दिलासा द्यावा,” अशी मागणी निकाळजे यांनी केली आहे.
दरम्यान, या मागणीवर प्रशासन काय निर्णय घेते, याकडे हॉटेल व्यावसायिकांचे लक्ष लागले आहे.
