प्रतिनिधी इंदापूर)
सपकळवाडी येथील जिल्हा परिषद प्राथमिक शाळेत शनिवार, दि. २५ एप्रिल २०२६ रोजी इयत्ता चौथीच्या विद्यार्थ्यांचा निरोप समारंभ तसेच इयत्ता पहिलीच्या नवीन विद्यार्थ्यांसाठी २०२६-२७ या शैक्षणिक वर्षाचा प्रवेशोत्सव कार्यक्रम अत्यंत उत्साहपूर्ण वातावरणात पार पडला.
कार्यक्रमात इयत्ता पहिलीमध्ये प्रवेश घेतलेल्या चिमुकल्या विद्यार्थ्यांचा आनंद, उत्साह आणि त्यांच्या शैक्षणिक प्रवासाची नवी सुरुवात पाहून उपस्थितांसाठी हा क्षण आनंददायी ठरला. नवीन शाळा, नवीन मित्र आणि नवीन शिकण्याची उमेद यामुळे वातावरणात उत्साहाचे वातावरण होते.
दुसरीकडे, इयत्ता चौथीतील विद्यार्थ्यांचा निरोप घेताना भावनिक वातावरण निर्माण झाले. विद्यार्थ्यांच्या डोळ्यांत आलेले अश्रू आणि शाळेबद्दलची जिव्हाळ्याची भावना पाहून उपस्थितही भावुक झाले.
या प्रसंगी इयत्ता चौथीच्या विद्यार्थ्यांच्या पालकांनी शाळेबद्दल कृतज्ञता व्यक्त करत शाळेला एक प्रिंटर भेट स्वरूपात दिला. या भेटीमुळे शाळेच्या शैक्षणिक व प्रशासकीय कामकाजात मोलाची भर पडणार असून या उपक्रमाचे सर्वत्र कौतुक करण्यात आले.
कार्यक्रमाला पालक, शिक्षकवृंद, शाळा व्यवस्थापन समितीचे सदस्य, अध्यक्ष व उपाध्यक्ष मोठ्या संख्येने उपस्थित होते. कार्यक्रम यशस्वी करण्यासाठी शिक्षकांनी केलेले उत्तम नियोजन व परिश्रम विशेष उल्लेखनीय ठरले.
शेवटी शाळेच्या वतीने उपस्थित सर्व मान्यवरांचे व पालकांचे मनःपूर्वक आभार व्यक्त करण्यात आले.
