अहमदपूर (प्रतिनिधी)
अहमदपूर तालुक्यातील मोहगाव येथे एका किराणा दुकानात सुरू असलेल्या प्रतिबंधित गुटखा विक्रीवर पोलिसांनी धाड टाकून १५ हजार ६०० रुपये किमतीचा मुद्देमाल जप्त केला आहे.
मिळालेल्या माहितीनुसार, दि. २५ एप्रिल २०२६ रोजी सकाळी सुमारे ६.४५ वाजता उपविभागीय पोलिसांनी मोहगाव येथील दामोदर खोडवे यांच्या खोडवे किराणा दुकानावर कारवाई केली. यावेळी दुकानात शासनाने बंदी घातलेला गुटखा व पान मसाला विक्रीसाठी साठवून ठेवलेला आढळून आला.
जप्त करण्यात आलेल्या मुद्देमालामध्ये प्रत्येकी ५२ पाऊच असलेले तंबाखूचे दोन पांढरे पोते (प्रति पाऊच ३० रुपये, एकूण किंमत ३,१२० रुपये) तसेच विमल पान मसाल्याचे प्रत्येकी ५२ पाऊच असलेले दोन पांढरे पोते (प्रति पाऊच १२० रुपये, एकूण किंमत १२,४८० रुपये) असा एकूण १५,६०० रुपयांचा माल समाविष्ट आहे.
मानवी आरोग्यास अपायकारक असलेल्या आणि शासनाने प्रतिबंधित केलेल्या या पदार्थांची जाणीव असूनही विक्रीसाठी साठा ठेवल्याप्रकरणी आरोपी दामोदर खोडवे (रा. मोहगाव) यांच्याविरुद्ध गुन्हा दाखल करण्यात आला आहे. ही कारवाई धर्मपाल गोविंदराव गुट्टे (पोना पोलीस स्टेशन, अहमदपूर) यांच्या फिर्यादीवरून करण्यात आली.
पुढील तपास सहाय्यक पोलीस निरीक्षक माणिक डोके यांच्या मार्गदर्शनाखाली पोलीस उपनिरीक्षक सिरसाठ करीत आहेत.
