सेलू (प्रतिनिधी)
सेलू तालुक्यातील खत व कीटकनाशक विक्रेत्यांनी विविध प्रलंबित मागण्यांसाठी २७ एप्रिल २०२६ पासून बेमुदत बंद पुकारला आहे. सेलू तालुका सीड्स, फर्टिलायझर अँड पेस्टिसाईड्स डीलर्स असोसिएशनच्या वतीने हा निर्णय घेण्यात आला असून, या बंदमुळे तालुक्यातील कृषी सेवा विस्कळीत होण्याची शक्यता वर्तवली जात आहे.
असोसिएशनच्या माहितीनुसार, राज्यातील कृषी विक्रेत्यांवर लादण्यात येणाऱ्या विविध नियमांविरोधात हा बंद पुकारण्यात आला आहे. अनधिकृत बीटी बियाण्यांच्या विक्रीवरील कारवाई, खत कंपन्यांकडून केली जाणारी ‘लिंकिंग’ पद्धत, तसेच कीटकनाशके व खते थेट एजंटमार्फत शेतकऱ्यांना विक्री करण्याच्या प्रकारांविरोधात विक्रेत्यांनी आक्षेप घेतला आहे.
तसेच, ऑनलाइन माध्यमातून बियाणे विक्री सक्तीची करणे, किरकोळ विक्रेत्यांवर लादलेले कडक नियम आणि कीटकनाशक कंपन्यांकडून एक्सपायरी माल परत न घेण्याच्या धोरणाचाही निषेध करण्यात आला आहे. ‘इन्स्पेक्टर राज’ वाढवण्याच्या निर्णयालाही विक्रेत्यांनी तीव्र विरोध दर्शवला आहे.
नवीन बियाणे व कीटकनाशक कायद्यांमुळे विक्रेत्यांवर अन्याय होत असल्याचा आरोप करत, संबंधित मागण्या मान्य होईपर्यंत बंद कायम ठेवण्याचा इशारा देण्यात आला आहे. दरम्यान, या बंदचा परिणाम शेतकऱ्यांवर होण्याची शक्यता असून, प्रशासनाने याकडे लक्ष देण्याची गरज व्यक्त होत आहे.
