चामोर्शी (प्रतिनिधी)
गौमाता सन्मान दिनानिमित्त भाजपा आदिवासी मोर्चाचे प्रदेशाध्यक्ष तथा माजी आमदार डॉ. देवराव होळी यांनी चामोर्शी येथील दीपकधाम गौशाळेला भेट देत गौमातेचे पूजन केले. यावेळी त्यांनी स्वतः चारा भरवून गौसेवेचा संदेश दिला.
या प्रसंगी उपस्थित कार्यकर्त्यांना मार्गदर्शन करताना डॉ. होळी यांनी भारतीय संस्कृतीत गौमातेचे असलेले महत्त्व अधोरेखित केले. गौसंवर्धन, पर्यावरण संरक्षण आणि ग्रामीण अर्थव्यवस्थेला चालना देण्यासाठी गौशाळांचे योगदान महत्त्वाचे असल्याचे त्यांनी नमूद केले. समाजात सेवा, संवर्धन आणि संस्कार यांचा संदेश प्रत्येकाने पोहोचवावा, असे आवाहनही त्यांनी केले.
कार्यक्रमाला अक्षय नागपुरे, विशाल सोमणकर, प्रज्वल सोमणकर, प्रभात बुरे, किशोर पसंडे, वैभव सोमणकर, बंडू दूधबळे यांच्यासह भाजपा आदिवासी मोर्चाचे पदाधिकारी, कार्यकर्ते आणि गौशाळा व्यवस्थापन समितीचे सदस्य मोठ्या संख्येने उपस्थित होते.
डॉ. होळी यांच्या भेटीमुळे कार्यकर्त्यांमध्ये उत्साहाचे वातावरण निर्माण झाले.
