कल्याण (प्रतिनिधी)
१ मे महाराष्ट्र दिनाचे औचित्य साधत सनय छत्रपती शासन पक्षाचे ठाणे जिल्हाध्यक्ष अविनाश हौसाबाई भगवान पाटील यांनी आपल्या सहकाऱ्यांसह कल्याण येथील मेट्रो मॉलमधील चित्रपटगृहात ‘राजे शिवाजी’ हा ऐतिहासिक चित्रपट पाहत उत्साहात साजरा केला. यावेळी महाराजांच्या जयघोषात वातावरण दुमदुमून गेले होते.
राजे शिवाजी या चित्रपटाने प्रेक्षकांना अक्षरशः भारावून टाकले. छत्रपती शिवाजी महाराजांच्या पराक्रमाचे दमदार आणि वास्तवदर्शी चित्रण यात करण्यात आले आहे. विशेषतः युद्धातील प्रसंग, जखमी अवस्थेतील राजे आणि संघर्षमय जीवनाचे दर्शन प्रेक्षकांच्या मनाला भिडणारे ठरले.
या चित्रपटाद्वारे रितेश देशमुख यांनी शिवचरित्राला एका नव्या उंचीवर नेल्याची भावना उपस्थितांनी व्यक्त केली. चित्रपटाची कथा शिवाजी महाराजांच्या पूर्वजांपासून अफजलखान वधापर्यंतचा प्रवास प्रभावीपणे मांडते.
चित्रपटातील अजय-अतुल यांचे संगीत, भव्य छायांकन आणि थरारक अॅक्शन दृश्यांनी प्रेक्षकांना खिळवून ठेवले. इतिहास सल्लागार केतन पुरी यांच्या अभ्यासपूर्ण मार्गदर्शनामुळे प्रत्येक प्रसंग अधिक वास्तवदर्शी वाटतो.
उपस्थित कार्यकर्त्यांनी सर्वांनी हा चित्रपट आवर्जून पाहावा, तसेच नव्या पिढीला शिवरायांचा इतिहास समजण्यासाठी मुलांना चित्रपटगृहात घेऊन जाण्याचे आवाहन केले. महाराष्ट्र दिनाचा उत्सव अशा ऐतिहासिक चित्रपटाच्या माध्यमातून साजरा करताना अभिमानाची भावना व्यक्त करण्यात आली.
