वर्धा, दि. १ (जिमाका)
महाराष्ट्र राज्याच्या ६७ व्या स्थापना दिनानिमित्त वर्धा येथे उत्साहात कार्यक्रम पार पडला. पोलिस कवायत मैदानावर पालकमंत्री डॉ. पंकज भोयर यांच्या हस्ते ध्वजारोहण करण्यात आले. यावेळी त्यांनी राज्याच्या विकासाचा आढावा घेत विविध योजनांच्या प्रभावी अंमलबजावणीमुळे महाराष्ट्र प्रगतीशील राज्य म्हणून ओळख निर्माण केल्याचे प्रतिपादन केले.
कार्यक्रमाला जिल्हाधिकारी वान्मथी सी, मुख्य कार्यकारी अधिकारी पराग सोमण, जिल्हा पोलीस अधीक्षक सौरभ कुमार अग्रवाल, अतिरिक्त जिल्हाधिकारी श्रीपती मोरे यांच्यासह अनेक मान्यवर उपस्थित होते. सुरुवातीला राज्य स्थापनेसाठी योगदान देणाऱ्या शहीदांना अभिवादन करण्यात आले.
पालकमंत्र्यांनी सांगितले की, शेती, सिंचन, ऊर्जा, उद्योग आणि रोजगार या सर्व क्षेत्रांत राज्याने भक्कम प्रगती केली आहे. शेतकऱ्यांच्या हितासाठी कर्जमाफी, पीककर्ज वाटप आणि विविध आर्थिक सहाय्य योजनांची अंमलबजावणी करण्यात आली आहे. पात्र शेतकऱ्यांना २ लाख रुपयांपर्यंत कर्जमाफी तर नियमित कर्जफेड करणाऱ्यांना ५० हजार रुपयांपर्यंत प्रोत्साहनपर लाभ दिला जाणार आहे.
जिल्ह्यातील १ लाख २९ हजार शेतकऱ्यांना पीएम किसान व नमो शेतकरी महासन्मान निधी योजनेंतर्गत १२९ कोटी रुपयांचे सहाय्य देण्यात आले असून ८२ हजार शेतकऱ्यांना १४३ कोटी रुपयांची वीज बिल माफी देण्यात आली आहे. तसेच ५५ हजार शेतकऱ्यांना ८८८ कोटी रुपयांचे पीककर्ज वाटप करण्यात आले असून यावर्षी ११०० कोटी रुपयांचे उद्दिष्ट ठेवण्यात आले आहे.
उद्योग क्षेत्रालाही चालना देताना प्रधानमंत्री सूक्ष्म अन्न प्रक्रिया उद्योग योजनेतून १०७२ उद्योगांना २४ कोटींचा कर्जपुरवठा करण्यात आला आहे. जिल्ह्यातील महिला सक्षमीकरणासाठी १.४२ लाख महिला ‘लखपती दीदी’ बनल्या असून ‘वर्धिनी मॉल’सारख्या उपक्रमांद्वारे त्यांच्या उत्पादनांना बाजारपेठ उपलब्ध करून देण्यात येत आहे.
याशिवाय बोर व्याघ्र प्रकल्प परिसरात निसर्ग पर्यटन विकास, शाळांमध्ये सीसीटीव्ही बसविणे, आदर्श शाळा उपक्रम, युवकांसाठी तांत्रिक प्रशिक्षण केंद्र, तसेच वर्धा येथे न्याय सहाय्यक वैज्ञानिक प्रयोगशाळा व प्रशिक्षण केंद्र उभारण्याचे काम सुरू असल्याची माहितीही त्यांनी दिली.
कार्यक्रमानंतर पालकमंत्र्यांनी पोलिस परेडचे निरीक्षण केले व उत्कृष्ट कामगिरी करणाऱ्या अधिकारी-कर्मचाऱ्यांचा सत्कार केला. कार्यक्रमास नागरिकांची मोठ्या प्रमाणावर उपस्थिती होती.
