शिरूर (प्रतिनिधी) – शिरूर शहरातील कबड्डी आणि खो-खो खेळाडूंसाठी सरावाची मोठी सोय उपलब्ध करून देण्यात आली आहे. जिजामाता गार्डनच्या शेजारी असलेल्या शिरूर नगरपरिषदेच्या शाळेच्या परिसरात स्वतंत्र क्रीडांगण तयार करण्यात आले असून, या मैदानासाठी थेट लवासा येथून लाल माती मागवण्यात आली आहे.
नगराध्यक्षा ऐश्वर्याताई अभिजित पाचर्णे या स्वतः खेळाची आवड असलेल्या असल्यामुळे त्यांनी खेळाडूंच्या गरजा ओळखून हा उपक्रम राबवला. मैदानाची उभारणी दर्जेदार पद्धतीने करण्यात आली असून त्यांनी स्वतः उपस्थित राहून पाहणी केली आणि खेळाडूंशी संवाद साधत त्यांच्या अडचणी जाणून घेतल्या.
या मैदानाचा लाभ शिरूर नगरपरिषदेच्या सर्व शाळांतील विद्यार्थ्यांना होणार असून, बाहेरील खेळाडूंनाही माफक दरात मैदान उपलब्ध करून देण्याची व्यवस्था करण्यात येणार आहे. पाहणीवेळी नगरसेवक व नगरसेविका उपस्थित होते.
या उपक्रमामुळे शिरूरमध्ये क्रीडा क्षेत्राला नवी चालना मिळणार असून नगराध्यक्षा ऐश्वर्याताई पाचर्णे यांच्या कार्याचे सर्वत्र कौतुक होत आहे.
