पुणे प्रतिनिधी-
शिरूर, महाराष्ट्र राज्य विद्युत वितरण कंपनी मर्यादित (महावितरण) यांच्या वतीने ‘कामगार दिना’निमित्त सन २०२५-२६ मधील उल्लेखनीय कामगिरीबद्दल वरिष्ठ तंत्रज्ञ स्वप्नील सुरेश सोनवणे यांना ‘उत्कृष्ट तांत्रिक कामगार पुरस्कार’ देऊन गौरविण्यात आले. हा सन्मान बारामती येथे मुख्य अभियंता धर्मराज पैठकर यांच्या हस्ते प्रदान करण्यात आला.
महावितरणच्या तांत्रिक विभागात कार्यरत असताना स्वप्नील सोनवणे यांनी केलेल्या उत्कृष्ट सेवेमुळे त्यांची निवड या प्रतिष्ठेच्या पुरस्कारासाठी करण्यात आली. आपल्या सेवाकाळात त्यांनी विना अपघात कामगिरी करत सुरळीत वीजपुरवठा कायम ठेवला. तसेच रौहित्रांची नियमित देखभाल, अचानक उद्भवणाऱ्या तांत्रिक समस्यांचे तत्परतेने निराकरण, तसेच कामाच्या ठिकाणाची योग्य देखभाल या सर्व क्षेत्रांत त्यांनी कर्तव्यदक्षता, निष्ठा आणि प्रामाणिकपणा दाखवून उल्लेखनीय कार्य केले आहे.
त्यांच्या या अविरत आणि जबाबदारीपूर्ण सेवेमुळे महावितरणच्या कार्यात मोठा हातभार लागला असून त्यांच्या कार्याचा सन्मान म्हणून हा पुरस्कार देण्यात आला. यावेळी त्यांच्या कार्याचे सर्व स्तरांतून कौतुक करण्यात आले.
याप्रसंगी बोलताना मुख्य अभियंता धर्मराज पैठकर यांनी स्वप्नील सोनवणे यांच्या कामगिरीचे विशेष कौतुक करत, “आपली ही निष्ठावंत सेवा आणि प्रामाणिक कामगिरी ही भावी यशाची नांदी ठरो,” अशा शुभेच्छा दिल्या.
स्वप्नील सोनवणे यांच्या या यशामुळे सहकारी, अधिकारी आणि परिसरातील नागरिकांमध्ये आनंदाचे वातावरण असून त्यांच्या पुढील वाटचालीसाठी सर्वत्र शुभेच्छांचा वर्षाव होत आहे.
