शहादा, दि. ०२ (प्रतिनिधी) – शहादा येथील चावरा इंग्लिश मीडियम स्कूलविरोधात जिल्हा परिषदेच्या प्राथमिक शिक्षण विभागाने कडक भूमिका घेतली असून शाळेला कारणे दाखवा नोटीस बजावण्यात आली आहे. शासनाच्या नियमांचे उल्लंघन, बेकायदेशीर वर्ग संचालन आणि विद्यार्थ्यांच्या छळासारख्या गंभीर आरोपांची दखल घेत ही कारवाई करण्यात आली आहे. तीन दिवसांत समाधानकारक खुलासा न केल्यास शाळेची मान्यता रद्द करण्याचा इशारा देण्यात आला आहे.
मिळालेल्या माहितीनुसार, अखिल भारतीय ग्राहक पंचायतीचे तालुका अध्यक्ष अनिल भामरे यांनी १५ एप्रिल रोजी शाळेविरोधात तक्रार दाखल केली होती. गटशिक्षणाधिकाऱ्यांकडून करण्यात आलेल्या चौकशीत २२ एप्रिल रोजी अनेक गंभीर अनियमितता उघड झाल्या.
चौकशीत आढळलेल्या मुख्य बाबी अशा –
- आयसीएसई मंडळाची अधिकृत मान्यता नसताना अभ्यासक्रम सुरू
- पालकांना विशिष्ट दुकानांतूनच पुस्तके व गणवेश खरेदीसाठी दबाव
- ११० शिक्षकांपैकी ६१ शिक्षकांकडे व्यावसायिक पात्रता नाही, तर ४९ शिक्षक शैक्षणिकदृष्ट्या अपात्र
- विद्यार्थी सुरक्षिततेसाठी आवश्यक सुविधा (CCTV, सखी सावित्री समिती, तक्रार पेटी) अनुपस्थित
- राष्ट्रगीत व राज्यगीताबाबत नियमांचे उल्लंघन
- पालक-शिक्षक संघाच्या संमतीशिवाय १५% फी वाढ
याशिवाय, फी न भरल्यामुळे विद्यार्थ्यांचा मानसिक छळ केल्याच्या तक्रारी असून, इयत्ता ७ वीतील विद्यार्थिनीशी गैरवर्तन झाल्याची गंभीर बाबही समोर आली आहे. हे प्रकरण पॉक्सो कायद्यांतर्गत येत असल्याचे नोटिसीत नमूद करण्यात आले आहे.
शिक्षण विभागाने शाळेला केवळ तीन दिवसांची मुदत देत स्पष्ट केले आहे की, समाधानकारक खुलासा न झाल्यास मान्यता रद्द करण्यासोबतच प्रशासकीय व फौजदारी कारवाई करण्यात येईल.
या कारवाईमुळे शहादा शहरातील शिक्षण क्षेत्रात मोठी खळबळ उडाली असून पालकांमध्ये चिंतेचे वातावरण निर्माण झाले आहे.
